Presidenti i Turqisë, Recep Tayyip Erdogan, bëri thirrje sot për një rishikim të madh të Kombeve të Bashkuara, raporton Anadolu.
“OKB-ja duhet të reformohet plotësisht. Bota nuk mund të lihet në mëshirën e pesë vendeve të përhershme (anëtare të Këshillit të Sigurimit). Fati i 194 vendeve nuk mund të lihet në duart e këtyre pesë anëtarëve të përhershëm,” tha Erdogan në një fjalim në Forumin Botëror të TRT-së në Stamboll.
Erdogan dënoi sistemin e pesë anëtarëve të përhershëm të Këshillit të Sigurimit, sipas të cilit këto vende mund të vënë veton në mënyrë të pavarur ndaj vendimeve të rëndësishme, duke thënë: “Bota është më e madhe se pesë”.
“Nëse nuk veprojmë sot, kur do të veprojmë?”
“Lufta ruso-ukrainase, e cila së shpejti do të hyjë në vitin e saj të katërt, na ka treguar dobësinë e sistemit ndërkombëtar”, shtoi ai. Ai theksoi se në Gaza nuk janë testuar vetëm vlerat humanitare, por edhe besueshmëria e sistemit global dhe OKB-së. Ai beson se ndjenja e fajit për Holokaustin i detyroi vendet perëndimore të përmbahen nga kritikat ndaj Izraelit, i cili ka “kryer gjenocid në Gaza për më shumë se një vit”.
“A mund të themi ‘nuk na shqetëson’, përballë agresionit izraelit që rrezikon jo vetëm qytetarët e tij, por edhe të gjithë ata që jetojnë në rajon. Kur ka paqe, kur mund të jetojmë së bashku në paqe, pse gjithë ky gjak, konflikte, luftë, nëse nuk veprojmë sot, kur do të veprojmë?”, pyeti ai.
Ai shprehu shpresën se armëpushimi midis Izraelit dhe Hezbollahut do të mbetet i përhershëm, por theksoi se një armëpushim në Gaza është urgjentisht i nevojshëm. “Vendosja urgjente e një armëpushimi të qëndrueshëm në Gaza është e nevojshme përpara se njerëzimi të humbasë edhe më shumë nga vlerat e tij. Ne jemi gati të bëjmë gjithçka për të ndaluar gjenocidin në Gaza dhe për të hapur derën për paqen e qëndrueshme,” përfundoi ai.
