LDK dënon sulmet në Veri: thirrje për masa urgjente nga institucionet dhe partnerët ndërkombëtarë

Lidhja Demokratike e Kosovës (LDK) ka dënuar ashpër sulmet e fundit në veri të vendit, duke i cilësuar si akte terroriste të papranueshme që kërcënojnë sigurinë, stabilitetin dhe demokracinë e Republikës së Kosovës. Në një komunikatë për media, LDK theksoi se këto veprime kriminale kërkojnë një reagim të menjëhershëm nga institucionet e drejtësisë. Partia kërkoi masa të shpejta për identifikimin dhe ndjekjen penale të përgjegjësve për sulmet, duke nënvizuar nevojën për bashkëpunim të ngushtë me partnerët ndërkombëtarë për të parandaluar përsëritjen e këtyre incidenteve dhe për të garantuar qetësinë publike. “LDK mbetet e përkushtuar për të mbështetur sigurinë dhe stabilitetin e qytetarëve tanë dhe qëndron fuqishëm përkrah institucioneve shtetërore të sigurisë dhe partnerëve ndërkombëtarë për të mbrojtur integritetin dhe rendin në vend,” thuhet në komunikatë. LDK u bën thirrje qytetarëve të ruajnë qetësinë, ndërsa fton institucionet relevante të demonstrojnë vendosmëri dhe transparencë në përballjen me kërcënimet ndaj rendit kushtetues. /Kosovatimes/