Trajneri i Chelseas, Enzo Maresca, ka theksuar se skuadra e tij nuk është pjesë e garës për titullin në Premier League dhe është e përqendruar vetëm në përmirësimin e lojës nga ndeshja në ndeshje.
Chelsea aktualisht renditet e katërta në tabelën e Premier League, me dy humbje nga dymbëdhjetë ndeshje. Humbjet e vetme të ekipit londinez kanë ardhur ndaj kampionit në fuqi, Manchester City, liderit aktual në tabelë, Liverpool.
Trajneri italian ka insistuar se Chelsea është ende një skuadër në zhvillim dhe se fokusi i tij është te përmirësimi i vazhdueshëm i performancës.
Kur është pyetur nëse Chelsea është pjesë e garës për titull, Maresca ka thënë “jo”. “Jo. E kam thënë shumë herë. Më pëlqen presioni. Do të doja të thosha: ‘Po, jemi aty’, por nuk jemi aty”, ka thënë ai për gazetarët para ndeshjes të së dielës ndaj Aston Villa në “Stamford Bridge”.
“Është bukur të shohësh skuadrën që po përmirësohet, kjo është e rëndësishme; është një ndjesi e mirë. Në të njëjtën kohë, duhet të jemi realiste dhe mund ta shihni diferencën midis nesh dhe të tjerëve në këtë moment. Kjo nuk do të thotë që ne nuk do të fitojmë ndeshje dhe nuk do të konkurrojmë deri në fund, por fokusi kryesor duhet të jetë ndjesia se po përmirësohemi nga ndeshja në ndeshje.”
Chelsea do të përballet me Aston Villa këtë të diel në Premier League, dhe Maresca e ka cilësuar kundërshtarin si një ekip të fortë, duke vlerësuar trajnerin e Villa, Unai Emery.
“Villa ka një trajner të shkëlqyer, ata po bëjnë gjëra fantastike. E njoh Emery-n nga Sevilla dhe e di sa të intensifikuar janë. Ata po tregojnë gjëra fantastike me lojtarë shumë të mirë. Do të jetë një ndeshje e vështirë”, është shprehur Maresca.
