Sipas Ministrisë së Mbrojtjes së Rusisë, Belousov gjatë vizitës së tij është planifikuar të zhvillojë një sërë takimesh dypalëshe me përfaqësues të udhëheqjes ushtarake dhe ushtarako-politike të Koresë së Veriut.
Në aeroportin ndërkombëtar në periferi të Phenianit, Belousov u prit me nderimet më të larta ushtarake dhe një roje nderi nga Ushtria Popullore Koreane.
Herën e fundit që Andrei Belousov vizitoi Korenë e Veriut, ky vend dhe Rusia nënshkruan një marrëveshje për partneritetin strategjik të dy vendeve.
Më 9 nëntor, kjo marrëveshje u ratifikua zyrtarisht nga Presidenti i Rusisë Vladimir Putin, dhe jo shumë kohë më pas nga zyrtarët e Koresë së Veriut.
Ky bashkëpunim i acaroi më tej marrëdhëniet mes Perëndimit dhe Rusisë, duke pasur parasysh se pas nënshkrimit të marrëveshjes, pasoi ardhja e trupave të Koresë së Veriut në Rusi dhe më pas vendosja e tyre në frontin ukrainas.Gjithashtu, Koreja e Veriut kontribuoi ndjeshëm në kapacitetet ushtarake të Rusisë gjatë luftës duke dërguar municione dhe disa lloje armësh, lëvizje që u vlerësua në Ukrainë si një nivel i ri përshkallëzimi dhe shndërrimi i luftës në Ukrainë në një luftë me karakter ndërkombëtar.
