Ministri i Punëve të Brendshme, Xhelal Sveçla, ka reaguar ashpër ndaj sulmeve të fundit ndaj institucioneve në veri të Kosovës, duke i cilësuar ato si shprehje e dëshpërimit dhe qyqarllëkut të grupeve kriminale të dirigjuara nga Beogradi.
Sipas Sveçlës, këto banda kriminale janë në fazën e fundit të çmontimit, dhe veprimet e tyre të fundit tregojnë një përpjekje dëshpëruese për të demonstruar forcë. “Por ne jemi më të vendosur se kurrë për të eliminuar çdo grimcë kriminale dhe terroriste në vendin tonë,” deklaroi ai.
Ai nënvizoi se epoka e pandëshkueshmërisë dhe e amnistisë ndaj bandave kriminale ka përfunduar. Sveçla ritheksoi se kushtetutshmëria, ligjshmëria, rendi dhe ligji do të zbatohen në çdo pjesë të Kosovës, duke shtuar se askush nuk do të ndalojë lirinë dhe të drejtat e qytetarëve përmes frikës dhe terrorizimit.
Këto deklarata vijnë në një kohë kur tensionet në veri të Kosovës janë shtuar pas disa incidenteve të dhunshme ndaj institucioneve dhe zyrtarëve të sigurisë. Autoritetet e Kosovës kanë premtuar intensifikimin e përpjekjeve për të garantuar sigurinë dhe funksionimin e rendit në atë zonë. /Kosovatimes/
