Instituti për Siguri dhe Reziliencë – PREVENT ka dënuar fuqishëm sulmin sabotues dhe terrorist të kryer ndaj kanalit kryesor të Ibër Lepencit në fshatin Vragë, Komuna e Zubin Potokut. Ky sulm, sipas Institutit, përbën një akt të rëndë kundër infrastrukturës kritike të Kosovës, me pasoja të mëdha për furnizimin me ujë të Mitrovicës dhe Prishtinës, si dhe operacionet e Korporatës Energjetike të Kosovës (KEK).
Në një deklaratë publike, PREVENT thekson se sulmi ishte i organizuar dhe me synim destabilizimin e sigurisë në vend. “Ky sulm i kryer nga grupet ekstremiste serbe paraqet një akt të rëndë terrorist dhe sabotues kundër një objekti të infrastrukturës kritike të Kosovës. Ai është përgatitur, organizuar dhe ekzekutuar me përfshirjen e individëve ose grupeve të trajnuara për veprime sabotuese të sofistikuara, të cilat dyshohen se janë të mbështetura nga struktura shtetërore të Serbisë,” thuhet në deklaratë.
Instituti ka përshëndetur reagimin e partnerëve ndërkombëtarë si NATO, BE, SHBA, KFOR dhe vendet e QUINT-it për mbështetjen e dhënë në këtë situatë.
“Një qëndrim i qartë dhe i vendosur nga partnerët ndërkombëtarë është i domosdoshëm për të parandaluar përshkallëzimin e tensioneve dhe për të garantuar sigurinë dhe stabilitetin në rajon,” nënvizoi Instituti.
PREVENT ka kërkuar një hetim të plotë dhe të paanshëm për të identifikuar autorët dhe për t’i nxjerrë ata përpara drejtësisë. Gjithashtu, Instituti ka apeluar për përshpejtimin e masave për mbrojtjen e infrastrukturës kritike. “Ne bëjmë thirrje për krijimin e mekanizmave të përhershëm për mbrojtjen e objekteve strategjike. Ky bashkëpunim ndërsektorial është jetik për të parandaluar incidente të tilla në të ardhmen,” theksoi deklarata.
Instituti PREVENT gjithashtu i ka kërkuar qytetarëve të ruajnë qetësinë dhe të informohen vetëm nga burime zyrtare.
“Qytetarët duhet të shmangin lajmet e rreme dhe të besojnë në kapacitetet e institucioneve tona për të menaxhuar situatën,” thuhet në fund të deklaratës.
Instituti ka bërë gjithashtu thirrje ndaj bashkësisë ndërkombëtare që të ushtrojë presion mbi Serbinë për të ndaluar mbështetjen e grupeve ekstremiste, të cilat, sipas tyre, financohen dhe trajnohen nga struktura të lidhura me shtetin serb.
“Përfshirja aktive e mekanizmave ndërkombëtarë të sigurisë është thelbësore për të ruajtur integritetin dhe sovranitetin e Kosovës,” përfundon deklarata e Institutit PREVENT. /Kosovatimes/
