Aeroplanët luftarakë rusë raportohet se janë bashkuar me forcat ajrore siriane për t’i bombarduar rebelët që kishin marrë një pjesë të madhe të qytetit veriperëndimor të Alepos, duke e sfiduar pushtetin sundues të presidentit, Bashar al-Assad, në këtë vend të Lindjes së Mesme të përçarë nga lufta gjatë viteve të fundit.
Ndërkohë, Irani tha më 30 nëntor se rebelët e kanë sulmuar konsullatën e tij në Alepo, duke shtuar se ky ishe “agresion nga elementë terroristë”, megjithëse tha se nuk ka të lënduar dhe nuk dha shumë hollësi për ngjarjen.
Ministrat e jashtëm të Rusisë dhe Iranit shprehën mbështetje për aleatin e tyre të vjetër, Sirinë, sipas mediave shtetërore iraniane, të cilat cituan Abbas Araqchin e Iranit duke i thënë Sergei Lavrovit të Rusisë në një telefonatë se sulmet ishin pjesë e një plani izraelite-amerikan për destabilizimin e rajonit.
Sulmet ajrore thuhet se ndodhën një ditë, pasi islamistët dhe aleatët e tyre të mbështetur nga Turqia depërtuan në Alepo në një ofensivë të papritur kundër forcave të Qeverisë së Assadit. Raportet nga terreni thanë se rebelët kishin kapur pjesën më të madhe të qytetit, megjithëse hollësitë mbesin të paqarta.
Ushtria siriane konfirmoi se rebelët kishin hyrë në Alepo, por nuk pati konfirmim për sulmet ajrore ose për pjesëmarrjen e aeroplanëve rusë.
Zëdhënësi i Kremlinit, Dmitry Peskov, tha më 29 nëntor se Rusia i konsideron veprimet e rebelëve si shkelje të sovranitetit të Sirisë.
“Ne jemi në favor të autoriteteve siriane që të vendosin rregull dhe të rivendosin rendin kushtetues sa më shpejt të jetë e mundur”, tha ai.
Reuters citoi dy burime ushtarake siriane të kenë thënë se aeroplanët rusë dhe sirianë vunë në shënjestër pozicionet e rebelëve në një periferi të Alepos më 30 nëntor. Burimet thanë se Kremlini i ka premtuar Sirisë ndihmë shtesë ushtarake, që pritet të arrijë brenda dy deri në tre ditësh.
Observatori Sirian për të Drejtat e Njeriut, një monitorues i luftës, tha se luftëtarët, të udhëhequr nga lëvizja ekstremiste islamiste Hayat Tahrir al-Sham (HTS), morën nën kontroll “gjysmën e qytetit të Alepos,” duke detyruar forcat qeveritare të tërhiqen.
HTS më parë ka pasur lidhje me grupet ekstremiste Al-Qaeda dhe Shteti Islamik (IS), megjithëse shumë udhëheqës thuhet se janë ndarë nga ato organizata. Ajo më parë njihej si Jabhat al-Nusrah dhe Fronti al-Nusrah, i cili ishte dega e Al-Qaedës në Siri dhe është konsideruar organizatë terroriste nga OKB-ja dhe Shtetet e Bashkuara.
Ofensiva e rebelëve filloi më 27 nëntor, duke shtyrë ushtrinë siriane të mbyllë të gjitha rrugët kryesore brenda dhe jashtë qytetit.
Rami Abdel Rahman, drejtori i Observatorit Sirian, i tha Radio Fardas së REL-it se rebelët e armatosur kishin qenë duke u përgatitur për operacionin që nga shtatori, por Turqia e kishte parandaluar atë deri tani.
Dhuna në Alepo ndërpret një pauzë në luftën civile siriane, e cila ka qenë kryesisht e qetë gjatë katër viteve të fundit. Konflikti përfshinte Qeverinë e Assadit të mbështetur nga Moska dhe Teherani kundër rebelëve siriano-kurdë të mbështetur nga Shtetet e Bashkuara, ndërsa Turqia ndihmoi grupe të tjera rebele. Ushtria amerikane ende ka një numër trupash të vendosura në zonat e mbajtura nga kurdët në Siri.
Organizatat terroriste, përfshirë Shtetin Islamik, gjithashtu ishin të përfshira në luftime.
Rusia, Turqia dhe Irani nënshkruan një marrëveshje në vitin 2019 për të ngrirë konfliktin në pozicionet e atëhershme.
Observatori Sirian tha se të paktën 16 civilë u vranë më 30 nëntor kur një sulm ajror, i kryer ndoshta nga aeroplanët luftarakë rusë, goditi Alepon. Ai tha se sulmi “shënjestroi automjete civile” në një kryqëzim, duke lënë gjithashtu 20 persona të plagosur.
Ky incident e çon numrin e përgjithshëm të viktimave në qytet gjatë katër ditëve të fundit në 327.
Observatori me bazë në Britani mbledh informacionin e tij nga burimet në fushëbetejë dhe ka qenë i rëndësishëm gjatë gjithë luftës civile siriane.
Luftimet ndodhën mes frikës për një luftë më të gjerë në Lindjen e Mesme.
Forcat izraelite në Gazë po luftojnë ekstremistët e Hamasit – të cilësuar si një organizatë terroriste nga Shtetet e Bashkuara dhe BE-ja – ndërsa një armëpushim është në fuqi në Liban, ku Izraeli ka goditur drejtuesit e Hezbollahut, gjithashtu të cilësuar si grup terrorist nga Uashingtoni. BE-ja e ka futur në listën e zezë krahun ushtarak të Hezbollahut, por jo krahun politik.
Izraeli ka kryer sulme edhe kundër rebelëve Huthi të mbështetur nga Irani në Jemen.
