Në shumicën e vendeve në procesin e anëtarësimit në BE, një pjesë e madhe ose të paktën shumica e qytetarëve priren të besojnë në Bashkimin, përveç Serbisë, sipas një sondazhi të ri të specializuar të Eurobarometrit nga Komisioni Evropian, rezultatet e të cilit u publikuan sot.
Komisioni Evropian njoftoi se në shumicën e vendeve është shënuar trend pozitiv në procesin e zgjerimit dhe thekson se 81 për qind e të anketuarve në Shqipëri kanë besim në BE, në Mal të Zi 75 për qind dhe në “Kosovë” 70 për qind.
Edhe në Turqi, përqindja e atyre që kanë besim në BE është rritur me katër pikë përqindje krahasuar me sondazhin e mëparshëm, në 42 për qind.
Sondazhi tregoi se në nivel të BE-së, besimi në BE është në nivelin më të lartë në 17 vjet – 51 përqind e evropianëve priren t’i besojnë BE-së, me besimin më të lartë tek të rinjtë e moshës 15 deri në 24 vjeç.
Ndër anëtarët e BE-së, 44 për qind e qytetarëve kanë një imazh pozitiv për Bashkimin, 38 për qind kanë një imazh neutral dhe 17 për qind kanë një imazh negativ.
Një e treta e të anketuarve në BE mendojnë se në planin afatmesëm prioritet i Brukselit duhet të jetë siguria dhe mbrojtja dhe në listën e çështjeve më të rëndësishme janë edhe migrimi, ekonomia, klima dhe mjedisi, si dhe shëndetësia.
