Shkruan: Idriz MORINA
Sulmi terrorist ndaj objekteve të rëndësisë së veçantë, është vazhdimësi e sulmit terrorist shtetëror të Serbisë, të kryer në fshatin Banjë, para më se një viti (24 shtator 2023)!
Ky sulm terrorist ndaj infrastrukturës kritike shtetërore është dëshmi se Serbia nuk do të heqë dorë asnjëherë nga qëllimet ekspansioniste, të përcjella edhe me gjenocid, kulturocid, dëbim dhe zhdukje të shqiptarëve për më se dy shekuj.
Ky sulm dëshmon se bashkësia ndërkombëtare, nuk ia ka dalë që të përmbushë detyrimet e veta të vendosura ndaj Kosovës, pavarësisht lëshimeve të bëra për kompromis nga shqiptarët me Pakon Ahtisari, dhe me Marrëveshjet në Bruksel dhe Ohër!
Pra, për Serbinë nuk mjaftojnë, ashtu siç e kam vlerësuar në analizën time të 2009-ës, për Projektrezolutën e BE-së në Asamblenë Parlamentare të OKB-së (e miratuar pa ndryshime po atë natë), për lehtësimet e bisedimeve nga BE-ja, Kosovë-Serbi, se në fund të procesit serbët nuk do të kënaqen dhe as nuk do ta pranojnë as autonominë, gjë të cilën Kurti ia ofroi me Marrëveshjen Ohër-Bruksel!
Po ashtu ky sulm argumenton pse duhet të marrë fund retorika rrahagjoksëve, sikurse e pararendësve të Kurtit, të cilët gënjenin pas lufte se ata ishin çlirimtarët e vetëm, ani pse thuaja gjithkund në Kosovë forcat e UÇK-së, defilonin nëpër qytete vetëm disa ditë pas defilimit dhe vendosjes së KFOR-it, ndërsa kurrë nuk kishin defiluar në Mitrovicë – në veri!
Ata i fyenin shtetet kryesore aleate si SHBA, pa të cilat Kosova nuk mund të çlirohej dot, dhe as tani nuk mund të kishin sukses operacionet e dekriminalizimit të veriut! Por, në vend se të thuhej se po ndodhë dekriminalizimi rrihnin gjoks se po ndodhë çlirimi dhe po kthehet sovraniteti, i cili nuk kishte humbur asnjëherë, pavarësisht shkeljeve!
Ky sulm terrorist duhet të shërbejë si argument për bashkësinë ndërkombëtare, se retorika dhe diplomacia që ka përdorur ndaj Serbisë, në 25 vjet pas luftës, është e pamjaftueshme, dhe se duhet gjetur mënyra, që të ndodhë, ajo që kishte kërkuar dikur (1999) presidenti Biden, që të ndryshohej karakteri i Serbisë. Pra, vetëm me pranimin e humbjes së Kosovës në Kumanovë, nuk u arritën objektivat kryesore të vetë Perëndimit, që Serbia t’i nënshtrohej vlerave perëndimore.
Retorika aktuale e shteteve perëndimore, duhet të kthehet në artikulim, ndëshkues për Serbinë, ndoshta duke nisur me rivendosjen e zonës së sigurisë, në 5km vijë ajrore nga kufiri i Kosovës, në monitorim të KFOR-it, dhe ndalim fluturimin në 25 km për fluturaket serbe!
Dhe po ashtu një rialokim buxheti nga Kosova, prej një miliard euro në armatim!
