Protestuesit dhe policia u përleshën në kryeqytetin e Gjeorgjisë Tbilisi për të katërtën natë radhazi për kundërshtimin e vendimit të qeverisë për t’i dhënë fund negociatave për anëtarësimin në Bashkimin Evropian.
Në atë vend me 3.7 milionë banorë, tensionet janë rritur prej muajsh mes partisë qeverisëse Ëndrra Gjeorgjiane dhe atyre që e akuzojnë atë për zbatimin e një politike gjithnjë e më autoritare, antiperëndimore dhe pro-ruse.
Kriza u thellua të enjten e kaluar pasi qeveria njoftoi se do të ngrijë negociatat me BE-në për katër vjet, duke bërë që mijëra protestues pro-evropianë të përplasen me policinë, e cila u përgjigj me gaz lotsjellës dhe topa uji.
Protestuesit u mblodhën sërish në Tbilisi sonte në rrugën qendrore Rustaveli.
“Unë jam këtu për një arsye shumë të thjeshtë, për të mbrojtur të ardhmen time evropiane dhe demokracinë e vendit tim,” tha protestuesi Nikoloz Miruashvili.
Presidentja properëndimore e Gjeorgjisë Salome Zurabishvili bëri thirrje për presion ndaj Gjykatës Kushtetuese për të anuluar zgjedhjet e muajit të kaluar të fituara nga partia Ëndrra Gjeorgjiane. Edhe opozita edhe Zurabiçvili thonë se zgjedhjet janë manipuluar.
Mediat gjeorgjiane raportuan protesta në të paktën tetë qytete dhe qyteza.
BE-ja dhe Shtetet e Bashkuara janë të alarmuar nga këto lëvizje, të cilat i shohin si devijimin e Gjeorgjisë nga një rrugë pro-perëndimore dhe kthimin drejt sferës ruse të ndikimit.
Ëndrra Gjeorgjiane thotë se po vepron për të mbrojtur sovranitetin e vendit nga ndërhyrjet e jashtme.
Rusia monitoron gjithçka
Rusia po ndjek nga afër zhvillimet. Zyrtari i sigurisë Dmitry Medvedev, një ish-president rus, tha se një përpjekje për revolucion ishte duke u zhvilluar dhe shkroi në Telegram se Gjeorgjia “po lëvizte me shpejtësi në rrugën e Ukrainës, në një humnerë të errët. Zakonisht gjëra të tilla përfundojnë shumë keq.”
Kremlini nuk ka komentuar ende zyrtarisht mbi zhvillimet e fundit në Gjeorgji, por prej kohësh ka akuzuar Perëndimin për nxitjen e revolucioneve në vendet post-sovjetike që Moska i konsideron ende pjesë të sferës së saj të ndikimit. Medvedev, i cili tani është nënkryetar i Këshillit të Sigurisë Kombëtare të Federatës Ruse, komentoi gjithçka në kanalin Telegram sonte. Ai tha se një “përpjekje revolucioni” po ndodh në Gjeorgji, raporton Reuters.
Medvedev gjithashtu dukej se po aludonte për tensionet e së kaluarës që kanë lindur midis Rusisë dhe Ukrainës mbi BE-në. “Gjeorgjia po shkon shpejt në rrugën e Ukrainës,” tha Medvedev, duke shtuar: “Gjëra të tilla zakonisht përfundojnë shumë keq.”
Kryeministri gjeorgjian Irakli Kobahidze hodhi poshtë njoftimin e Uashingtonit të shtunën se po i jepte fund një partneriteti strategjik me Gjeorgjinë, duke shtuar se ai do të zhvillonte bisedime me administratën e re të Presidentit të zgjedhur Donald Trump kur ai të marrë detyrën në janar.
Presidentja Zurabishvili ka thënë se nuk do të japë dorëheqjen kur mandati i saj të përfundojë më vonë në dhjetor, pasi parlamenti i ri është i paligjshëm dhe nuk ka fuqi të emërojë pasardhësin e saj.
Kobahidze tha se e kuptonte “gjendjen emocionale” të Zurabishvilit. Natyrisht, ajo do të duhet të lirojë rezidencën e saj më 29 dhjetor dhe t’ia dorëzojë këtë godinë presidentit të zgjedhur legjitimisht”, tha ai.
