Në 80 vjetorin e lindjes së presidentit historik Ibrahim Rugova
Në këtë ditë madhështore, Zoti na dhuroi shpëtimtarin e qenies sonë kombëtare, liderin shpirtëror, Presidentin historik Ibrahim Rugova
Shkruan: Florim ZEQA
Tetëdhjetë vjet më parë, me 2 dhjetor të vitit 1944, familjes Rugova i lindi një trashëgimtar, Kosovës shpëtimtari, popullit shqiptar intelektuali i përmasave botërore, Ibrahim Rugova, figura më emblematike e historisë kombëtare.
Çdo popull i ka shenjtorët e vetë, më të cilët krenohet dhe identifikohet prej një periudhe në tjetrën
Shenjtorët për me tepër janë të njohur në fushën e religjioneve. Por ka edhe shenjtor që njihen si themelues të kombeve apo shteteve më të fuqishme botërore si p.sh.: Xhorxh Uashingtoni themelues i shtetit Amerikan, Giuseppe Mazzini themelues i shtetit unik Italian, Mustafa Kemal Ataturki arkitekt i Turqisë moderne, e personalitete të tjera anë e kënd botës përmes të cilëve identifikohen me krenari kombet e tyre.
Shenjtërimin e Ibrahim Rugovës e bëri vepra e tij madhore. Ai më urtësinë e tij, paqësisht e më plot dashuri hyri në zemrat e gjithë shqiptarëve të Kosovës, për të mbetur përjetësisht në kujtesën e popullit si shenjtor i historisë më të re, simbol i lirisë dhe pavarësisë së shtetit të Kosovës.
Rugova, më një shall rreth qafe, edhe në kohë të nxehta vere, nga personalitete të ndryshme botërore ishte kuptuar si një mesazh drejtuar botës së civilizuar dhe demokratike, se vendi i tij është i lidhur në qafë nga vargonjtë serbo sllav, që dëshirojnë të mbajnë edhe më tutje Kosovën si pjesë të saj, të dhënë dhuratë nga fuqitë e mëdha një shekull më parë, dhe se nuk do të ketë qetësi në Ballkan, rajon e më gjerë pa heqjen e vargonjve nga qafa e Kosovës.
Dhënia e gurëve të çmuar personaliteteve të shumta nga ana e Rugovës, e kishte simboliken e dyfishtë: e para, për pasuritë e shumta minerale që ka Kosova, ndërsa e dyta, simbolizonte bujarinë, mikpritjen dhe traditën e lashtë Ilire-Dardane të Kosovës.
Ibrahim Rugova i papërsëritshëm me virtytet njerëzore
Këmbëngulësia, urtësia, butësia, mençuria, e tij ishin virtyte të një burri të madh, të cilat bota demokratike i vlerësoi lartë. Mënyra e trajtimit të problemit të Kosovës para faktorëve ndërkombëtar, bëri që bota ta admiroj kërkesën e Rugovës për ndihmë në shpëtimin e një populli të pa mbrojtur nga makineria vrastare e regjimit gjenocidial të Serbisë së Millosheviqit.
Rëndësinë e Ibrahim Rugovës në shpëtimin e Kosovës dhe popullit të saj e kishte vërtetuar ambasadori e diplomati i njohur Amerikan Richard Hollbrook kur thoshte: “Kosova ndoshta nuk do të ekzistonte sot pa këmbëngulësinë e Rugovës”.
Se vërtetë Ibrahim Rugova ishte shpëtimtar i qenies sonë kombëtare, e argumentojnë disa vite më vonë edhe personalitetet më të njohura botërore si Bill Clinton, ish president i ShBA-ve dhe Tony Blair ish kryeministër i Britanisë se Madhe, para parlamentareve tanë në kuvendin e Kosovës kur thanë: “ishte Ibrahim Rugova ai që na solli në Kosovë”.
Lidhja emocionale që pati më popullin e vetë, Ibrahim Rugovën e bëri që të jetë udhëheqës shpirtëror, e bëri të mbetët përjetësisht në kujtesën dhe mendjen e popullit si shpëtimtar i qenies kombëtare apo si profet i kohës sonë moderne.
Projekti rugovian për shtetin e Kosovës
Populli i Kosovës, sikurse e ka për nder të ketë pasur një lider të përmasave botërore, ashtu edhe e ka për obligim të çojë në vend amanetin e tij, për një shtet vërtet sovran dhe demokratik, me simbole të vetat kombëtare, në vend të dizajnëve aktuale antikombëtare.
Ideja e presidentit Rugova e flamurit Dardan për flamur të shtetit të Kosovës, dhe e himnit “Kur ka ra kushtrimi n’ Kosovë”, janë ide që vetëm njerëzit e mëdhenj mund ti projektojnë.
Ky vigan i kombit shqiptar me vizionin e tij mahniti botën mbarë. Shumë popuj edhe më të mëdhenj se ne do të dëshironin të kishin pasur në radhët e veta një personalitet si Ibrahim Rugova. Qysh ne vitin 1998, Valter Veltroni, atë kohë lider i opozitës Italiane pat thënë: “é un grande peccato che una grande personalità come Ibrahim Rugova faccia parte di un popolo così piccolo”, që ne gjuhën shqipe do të thotë: “është mëkat i madh që një personalitet kaq i madh si Ibrahim Rugova të jetë pjesë e një populli të vogël”.
Ky nuk ishte mëkat, por fat i madh për ne si popull i vogël, qe patëm një njeri kaq të madh, një vizionar pragmatik, një lider të përgjegjshëm, një misionar të paqes i cili më urtësinë e tij shpëtoj një popull krejtësisht të pa mbrojtur nga shfarosja dhe gjenocidi serbo sllav.
I pathyeshëm në sfidat e kohës
Sikurse profetët e kohërave më të vjetra që kishin kundërshtarët e vet, ashtu edhe lideri ynë shpirtëror, Ibrahim Rugova kishte kundërshtarët e vet politik e ideor, para të cilëve nuk u gjunjëzua asnjëherë, dhe nuk ju përgjigj në asnjë rrethanë shpirtligjve, fatzinjve të kombit shqiptar.
Përkundër kërcënimeve e shantazheve, fyerjeve e sharjeve, akuzave e sulmeve, Ibrahim Rugova ishte i vendosur në rrugën e tij, në misionin e tij prej profeti, për të shpëtuar një popull nga shfarosja, dhe asnjëherë nuk u ndal që të arrijë në cakun final që ishte Pavarësia e Kosovës, nocion ky që i rrodhi vazhdimisht nga goja deri në frymën e tij të fundit.
E pikërisht këtu qëndron madhështia e Profetit, njeriut që e bëri realitet pavarësinë e Kosovës më politikën e tij paqësore.
Janë bërë krahasime të shumta mes figurave të shquara kombëtare, se kush ka bërë më shumë për kombin, për popullin e vet, janë bërë krahasime nga më të ndryshmet, por Ibrahim Rugova mbetet i pari në historinë e shqiptarëve, që më urtësinë e tij, aktivitetin e tij paqësor arriti të unifikoj gjithë faktorin kombëtar rreth lëvizjes paqësore demokratike (LDK), si dhe të fitojë përkrahjen e gjithë faktorëve ndërkombëtar në përpjekjet tona për çlirim, për ruajtjen dhe shpëtimin e qenies sonë kombëtare nga shfarosja dhe dëbimi serbo sllav.
Presidenti historik, ishte dhe do të mbetet përgjithmonë sinonim i së mirës, i paqes dhe tolerancës, i guximit dhe qëndresës, i afrimit në mes njerëzve, i dashurisë për bashkëkombësit dhe atdheun e vet të shenjt.
Tani, kur trupi i tij prehet në paqe, në token Dardane që aq shumë e deshi, shpirti i tij sikur është shndërruar në një yll që bën dritë e na i ngrohë zemrat, na jep forcë edhe kur ajo na mungon, na jep shpresë kur ajo nuk ekziston.
Kosovë, URIME datëlindja e engjëllit tënd, shpëtimtarit të qenies sonë kombëtare, presidentit historik IBRAHIM RUGOVA!
