Vetëm pas tri herë tentimesh për prezencë fizike ka arritur të nisë seanca plenare e Kuvendit, ku po debatohet për punën katërvjeçare të qeverisë të drejtuar nga kryeministri Albin Kurti. Debati nisi me fjalimin e kreut të deputetëve të AAK-së, Besnik Tahiri, si parti që inicioi seancën, që në fakt ishte thirrur në marsin e këtij viti për të diskutuar për 3 vjet qeverisje e që u ndryshua në mbledhjen e fundit të kryesisë për t’u shndërruar në debat për katër vjet qeverisje të Kurtit.
Tahiri e ka quajtur Qeverinë Kurti si qeverinë që sipas tij theu rekorde me shkelje kushtetuese.
“E para, kjo qeveri është qeveria më rekorde e shkeljeve kushtetuese. Përgjatë këtij mandati 9 raste janë të konfirmuara nga kushtetuesja si ligje antikushtetuese që në esencë kanë pasur kapjen e shtetit dhe dëmtimin e ekonomisë së lirë”, tha Tahiri para deputetëve.
Ai ka numëruar ato që sipas tij janë dështime e skandale të qeverisë në këtë mandat katër vjeçar.
“Dështimi i dytë lidhet me një ndër problemet dhe skandalet më korrupitve të historisë së Kosovës të tenderëve njëburimor. Gjatë periudhës 22 mars 2021 deri më 1 shtator 2024 kjo qeveri ka lidhur gjithsej 2123 kontrata me procedurë të negociuar pa publikim e njoftim të kontratës një burimore në vlerë totale prej 272 milion e 954 mijë e 724 euro të gjitha këto kontrata përfshijnë 775 aneks kontratat e 1348 kontrata të reja. E treta lidhet drejtpërdrejt me skandalin ambasadorit Martin Berishaj dhe pazareve që kanë ndodhur me energjinë për çka qeveria e kryeministri duhet të tregojë a kanë qenë në dijeni. Çështja e katërt me skandalin KEK, Nagip Krasniqi sot ka një aktakuzë, rasti është në prokurori ndërsa hajnia, keqmenaxhimi është aq marramendës deri te situata kur parapolitika na tregon kur ndalet e lëshohet rryma, tha Tahiri.
Sipas tij, kryeministri duhet tu tregojë qytetarëve “për skandalin RTK, për deklaratat e tij ndaj institucioneve dhe medieve të pavarura duke i akuzuar deri në atë masë që me i lidhë me akuza që mund të jenë akuza jashtëzakonisht problematike për gazetarët”.
“Sot, duhet qeveria të tregojë si humbi rastin me Contour Global, të tregojë për skandalin për Pagën Minimale të lidhjes me veteranët e UCK-së, a ka qenë ai që ka urdhëruar kryetaren e grupit të flas me Radoiçiqin dhe njerëzit që kanë pasur drejtpërdrejt ndikim në pagën minimale. Duhet të tregoj pse sot Kosova është e vetmja nën sanksione të BE-së. Si është e mundur që këmba e tij të mos shkelë në Departament në Shtetit, në Pentagon as në Shtëpinë e Bardhë”, tha ndër të tjera Tahiri i cili paraprakisht bëri të ditur se deputeti i pavarur Haki Abazi nga sot i është bashkuar grupit të tyre kuvendar.
