Bashkimi i Sindikatave të Pavarura të Kosovës nëpërmjet një komunikate për media ka shprehur përkrahjen institucionale ndaj kërkesave të Sindikatës së Bashkuar të Arsimit, Shkencës dhe Kulturës, të cilat do të paraqiten nesër në formë proteste.
“Si një federatë që përfaqëson me dinjitet interesat e mësimdhënësve dhe punëtorëve të arsimit në Kosovë, SBASHK ka paraqitur kërkesa legjitime që kanë për qëllim përmirësimin e kushteve të punës, respektimin e kontratave kolektive dhe fuqizimin e një sektori kritik për të ardhmen e vendit tonë. Arsimi, si shtyllë e zhvillimit të një shoqërie demokratike dhe të drejtë, meriton një përkushtim maksimal nga të gjitha institucionet përkatëse. Çdo neglizhencë në trajtimin e këtyre çështjeve reflekton drejtpërdrejt jo vetëm në mirëqenien e mësimdhënësve, por edhe në cilësinë e edukimit që marrin brezat e ardhshëm”, thuhet në komunikatën e BSPK-së.
Më tutje BSPK thekson se janë të përkushtuar në mbështetjen e tyre ndaj SBASHK-ut, në mënyrë që të arrihet zgjidhje e qëndrueshme përmes dialogut konstruktiv me Qeverinë dhe Ministrinë e Arsimit, e Shkencës, e Teknologjisë dhe të Inovacionit.
“Greva ose protesta nuk janë qëllimi ynë, por mjetet e fundit për të treguar rëndësinë e çështjeve të ngritura dhe për të kërkuar vëmendje institucionale. Ne theksojmë se vetëm përmes dialogut të sinqertë, bazuar në respektin e ndërsjellë dhe në mirëkuptim, mund të arrihen zgjidhje që përmbushin pritshmëritë e punëtorëve të arsimit dhe sigurojnë stabilitet në sistemin arsimor. Ftojmë Qeverinë dhe të gjitha palët e interesit që të adresojnë me prioritet këto kërkesa dhe të demonstrojnë një angazhim serioz për përmirësimin e kushteve në sektorin e arsimit”, vazhdon komunikata.
Ndërkohë kryetari i SBASHK-ut, Rrahman Jasharaj, në një konferencë për media sot deklaroi se nëse nuk reflektojnë zyrtarët e Qeverisë, sidomos lidhur me kontratën e re kolektive, atëherë nuk e përjashtojnë edhe grevën e përgjithshme.
