Trajneri i Napolit, Antonio Conte, ka bërë të ditur se në përballjen e së enjtes kundër Lazios, në kuadër të 1/16-ave të Kupës së Italisë, do t`u japë hapësirë lojtarëve që kanë pasur më pak minuta gjatë sezonit.
Napoli, që aktualisht kryeson tabelën e Serie A, nuk është pjesë e garave evropiane këtë sezon. Ky fakt, sipas Contes, i ndihmon në kampionat, por kufizon mundësitë për aktivizimin e të gjithë lojtarëve në skuadër.
“Këtë vit, në disa aspekte, situata po ndikon negativisht për shumë lojtarë, sepse kemi vetëm kampionatin dhe Kupën e Italisë”, ka thënë Conte. “Deri tani kemi luajtur dy ndeshje në Kupë, kundër Modenas dhe Palermos, ku lojtarët me më pak minuta patën mundësinë të tregojnë veten. Nesër do të jetë një tjetër mundësi për të vlerësuar progresin e secilit prej tyre.”
Conte ka theksuar se, pavarësisht rrotacionit, fokusi mbetet maksimal ndaj Lazios. “Ne gjithmonë i marrim ndeshjet njëra pas tjetrës, dhe më e rëndësishmja për ne është ajo e së enjtes”, ka thënë ai. “Do të bëj zgjedhje sepse kemi shumë lojtarë në dispozicion. Fillimi i sezonit ka qenë i mirë, por suksesi nuk është vetëm meritë e dymbëdhjetë-trembëdhjetë lojtarëve që luajnë më shumë. Është meritë e gjithë skuadrës, përfshirë ata që kanë pasur më pak minuta, por kanë dhënë maksimumin në stërvitje”.
