Trajneri i Manchester Cityt, Pep Guardiola, ka shprehur besim se tifozët do ta mbështesin ekipin në një periudhe të vështirë me rezultate të dobëta.
Manchester City, që skuadra po përgatitet për ndeshjen ndaj Nottingham Forest të mërkurën në Premier League, ndodhet në një krizë me shtatë ndeshje pa fitore në të gjitha kompeticionet, ndërsa humbja e katërt radhazi në kampionat ndaj Liverpool të dielën e ka lënë skuadrën në vendin e pestë të renditjes.
Guardiola beson se mbështetja e tifozëve do të jetë e rëndësishme për ta kapërcyer këtë periudhë të vështirë.
“Na duhen ata sepse situata është kjo që është. Ata kanë qenë gjithmonë pranë nesh dhe e dinë mirë çfarë ka arritur kjo skuadër gjatë dekadës së fundit”, ka thënë Guardiola para ndeshjes me Nottingham Forest. “Tifozët e dinë që kemi pasur shumë momente të mira së bashku dhe e kuptojnë se kemi nevojë absolute për përkrahjen e tyre. Të gjithë, veçanërisht lojtarët, janë të përkushtuar për të ndryshuar këtë dinamikë”.
Guardiola ka vlerësuar se fokusi duhet të kalojë nga titulli, drejt qëllimit të kthimit në zonën e katër më të mirëve. “Është një gabim i madh të mendosh për rezultatet e së kaluarës dhe objektivat e mëdha si titulli. Duhet të përqendrohemi për të mposhtur skuadra që janë afër nesh dhe të afrohemi me zonën e katër më të mirëve”, ka shtuar ai.
City do të përballet me një Nottingham Forest që ka befasuar këtë sezon dhe ndodhet një pikë pas tyre në renditjen e Premier League. Guardiola e vlerëson kundërshtarin për forcën fizike dhe përvojën e trajnerit Nuno Espirito Santo.
Aktualisht tabela e Premier League kryesohet nga Liverpool me tridhjetë e katër pikë, ndërsa City gjendet vetëm më vendin e pestë me njëzet e tri pikë.
