Mediat në Suedi dhe Finlandë raportuan për një ndërprerje të re të kabllove në linjën e internetit midis këtyre dy vendeve, dhe të gjitha shërbimet e sigurisë dhe policisë u përfshinë menjëherë në hetim.Sipas medias suedeze Aftonbladet, ka pasur një ndërprerje të dyfishtë të kabllove të internetit në rrugën ndërmjet Finlandës dhe Suedisë, dhe këto aktivitete janë konfirmuar edhe nga Agjencia Norvegjeze për Mbrojtjen dhe Përgatitjen e Komunitetit (MSB).
Thyerja e kabllove u zbulua mbrëmë dhe raportohet se ka ndodhur në kontinentin finlandez.
“Policia finlandeze dyshon për një akt sabotimi dhe autoritetet suedeze janë informuar për gjithçka. Ne e dimë se ka pasur një prishje kabllore dhe e kemi marrë atë informacion mbrëmë vonë”, njoftoi MSB.
Kompania Globel Connect, të cilës iu pre kablloja, tha për mediat suedeze se nga ky akt janë prekur 6000 përdorues privatë të internetit dhe 100 përdorues biznesi.
Ky është rasti i tretë i prerjes së kabllove në veri të Evropës gjatë muajit të kaluar. Në nëntor, mbërriti informacioni se dy kabllo nënujore u dëmtuan në Detin Baltik, njëri midis Finlandës dhe Gjermanisë dhe tjetri midis Suedisë dhe Lituanisë.
Hetimet për të dyja rastet janë ende në vazhdim dhe autoritetet në këto vende dyshojnë se në çdo gjë janë përfshirë operativë rusë dhe kinezë.
Sipas raportimeve, në kohën kur kabllot u dëmtuan në nëntor, në atë zonë ndodhej anija “I Peng 3” që lundronte nën flamurin e Kinës.
Zëdhënësi i Ministrisë së Jashtme kineze Lin Jian tha se autoritetet kineze nuk kishin informacion për anijen. Ai theksoi megjithatë se Kina është e gatshme të vazhdojë komunikimin me palët përkatëse në këtë rast.
