Instalacioni artistik i vendosur në shëtitoren e Urës së Ibrit në Mitrovicë, “Shtratlumet e rrënueme” dje është kapluar nga zjarri.
Policia dhe zjarrfikësit kanë intervenuar në vendin e ngjarjes, ndërkaq organizata “7 Arte” si realizues të veprës nën autorësinë e artistit Driton Selmani, e kanë cilësuar si djegie të qëllimshme.
“Vepra është vendosur në shetitoren pranë lumit Ibër gjatë ditës së djeshme, dhe po atë ditë (në orët e vona) është djegur me qëllimin për ta shkatërruar atë. Duket alegorike se si një vepër e krijuar me qëllim ndërgjegjësimin mjedisor dhe marrjen e masave për mbrojtjen e lumenjve, është djegur, duke krijuar një dëm të mëtejshëm ndaj mjedisit”, thuhet në komunikatën për media.
Instalacioni ishte rezultat i dalë nga punëtoria një javore “Çmimi i heshtjes”. Nga organizatorët cilëson si reagim përmes artit për të adresuar sfidat mjedisore dhe ndotjet e lumenjve të Mitrovicës. I tërë punimi është realizuar nga materiale të riciklueshme.
