Për shkak të kushteve të këqija atmosferike, kërkimi për dy amerikanë dhe një kanadez që u zhdukën teksa po përpiqeshin të ngjiteshin në majën më të lartë të Zelandës së Re është ngadalësuar.
Siç raporton CNN, Kurt Blair (56) dhe Carlos Romero (50) mbërritën në zonë të shtunën dhe planifikuan të pushtonin majën alpine 3724 metra të lartë mbi kreshtën Zurbriggen.
Ata u raportuan të zhdukur kur nuk u paraqitën për fluturimin e tyre të planifikuar të hënën në mëngjes, tha policia e Zelandës së Re.
Një helikopter dhe ekipet e kërkim-shpëtimit filluan kërkimin, por u desh të ndalonin për shkak të kushteve të motit në mal. Kërkimet nuk mund të rifillonin të martën pasi kushtet nuk u përmirësuan.
Disa sende të lidhura me ngjitjen, që besohet se i përkisnin tre burrave, u gjetën gjatë kohës së shkurtër që zona ishte në gjendje të kontrollohej. Nuk dihet se kur do të mund të vijojnë kërkimet për ta pasi është paralajmëruar mot i keq për ditët në vijim.
