Ndër vendet anëtare sot sërish nuk ka pasur marrëveshje për hapjen e negociatave me Serbinë në grupin 3, i cili përfshin tetë kapituj, sipas burimeve diplomatike.
Presidenca hungareze vendosi sot edhe një herë çështjen e hapjes së grupit 3 – konkurrueshmëria dhe rritja gjithëpërfshirëse – në axhendën e takimit të ambasadorëve të vendeve anëtare. Ky grup përfshin tetë kapituj: transformimi dixhital dhe media; taksat; politika ekonomike dhe monetare; politika sociale dhe punësimi, sipërmarrja dhe politika industriale; shkenca dhe kërkimi; arsimi dhe kultura; bashkimi doganor.
“Nuk ka përparim, ne po qëndrojmë aty ku ishim javën e kaluar”, tha një burim diplomatik për Hina.
Kroacia dhe shtatë vende kundër hapjes së klasterit
Javën e kaluar, tetë vende, mes tyre Kroacia, patën kundërshtime ndaj propozimit të presidencës hungareze për hapjen e këtij grupi. Arsyet kryesore për këtë janë refuzimi i Serbisë për të vendosur sanksione kundër Rusisë dhe përputhshmëri me politikën e jashtme të BE-së, sundimin e ligjit dhe gjendjen e mediave.
Para takimit të javës së kaluar, Serbia u shpërndau vendeve anëtare një dokument jozyrtar me një listë të hapave që synon të ndërmarrë për të marrë miratimin për hapjen e atij grupi. Disa vende kanë thënë se nuk mund të bëhet përparim në premtimet e bëra në atë dokument.
Hungaria njoftoi një përpjekje të re
Presidenca hungareze, e cila po e shtyn fort Serbinë, njofton se do të përpiqet sërish javën e ardhshme për të marrë miratimin për hapjen e këtij grupi.
Komisioni Evropian në raportin e tij të progresit vlerësoi se Serbia është teknikisht e gatshme për hapjen e atij grupi, por që kjo të ndodhë realisht duhet pëlqimi i të gjitha shteteve anëtare.
Negociatat me Serbinë praktikisht janë ngrirë që nga dhjetori i vitit 2021, kur ajo hapi kapitujt e fundit.
