Pasi u shfaqën thirrjet për shkarkimin e tij, ministri i Mbrojtjes i Koresë së Jugut, Kim Yong-hyun ka ofruar dorëheqjen. Ai iu bashkua kështu anëtarëve të tjerë të stafit presidencial të cilët ofruan dorëheqjen e tyre më herët gjatë ditës së sotme. Megjithatë, presidenti Yoon Suk-yeol duhet të pranojë dorëheqjet e përmendura që ato të hyjnë në fuqi.
Ministri Kim Yong-hyun i kërkoi falje publikut për përhapjen e konfuzionit dhe shkaktimin e shqetësimit, sipas një deklarate të ministrisë. Kim thotë se do të marrë përgjegjësinë e plotë për gjendjen e jashtëzakonshme. Spekulohet se ai ka pasur një ndikim shumë të rëndësishëm në vendimin e presidentit për vendosjen e gjendjes së jashtëzakonshme në Korenë e Jugut.
Procedurat e shkarkimit tashmë kanë filluar kundër Yoon. Për të kujtuar, Yoon shpalli gjendjen e jashtëzakonshme dje gjatë një fjalimi të drejtpërdrejtë televiziv rreth orës 20:30 me orën lokale, por u tërhoq pasi ligjvënësit, megjithë kordonët e policisë dhe forcave speciale rreth ndërtesës së parlamentit, votuan për të hedhur poshtë dekretin e tij.
Zyra e presidentit njoftoi se gjendja e jashtëzakonshme u shpall brenda natës për të “minimizuar dëmin në ekonominë kombëtare dhe jetën e njerëzve”. Sidoqoftë, Yoon përfundimisht braktisi përpjekjen e tij të dështuar për të ndaluar aktivitetet politike dhe për të censuruar median.
