Prokurorët e Prokurorisë Speciale të Kosovës, e kanë intervistuar për 4 orë ish-kryeshefin e Korporatës Energjetike, Nagip Krasniqi.
Në Prokurori Krasniqi hyri në orën 13:00 dhe nga aty doli pas orës 17:00.
Intervistimin në cilësinë e të pandehurit për një çështje penale e konfirmoi edhe Prokuroria Speciale, përmes zëdhënëses, Liridona Kozmaqi.
“Lidhur me rastin për të cilin keni pyetur Ju informoj se Nagip Krasniqi është paraqitur sot në Prokurorinë Speciale me ftesë të kësaj prokurorie. Ai është intervistuar në cilësinë e të pandehurit për një çështje penale, të cilën kjo prokurori e ka në hetim”, thuhet në përgjigjen e Kozmaqit.
Krasniqi me të dalë nga prokuroria, iu shmang medieve, ndërsa avokati i tij, Virtyt Ibrahimaga, tha se është hera e dytë që Krasniqi intervistohet nga prokuroria, por se nuk bëhet fjalë për hetime të reja.
“Keqpërdorim të detyrës zyrtare, që ka të bëjë me riparimin e bllokut A5 që ka fillu hetimi në janar të vitit 2023, kjo është intervista e dytë, nuk është çështje e re hetimore, por e vjetër”, tha Ibrahimaga.
Nagip Krasniqit i është ngritur një aktakuzë nga Prokuroria Speciale në gusht të këtij viti, mbi dyshimet për keqpërdorim të detyrës zyrtare.
Sipas aktakuzës, Krasniqi i kishte mundësuar tregtimin e energjisë një kompanie sllovene në Kosovë, e cila nuk kishte licencë, duke dëmtuar kështu KEK-un në vlerë rreth 3 milionë e 230 mijë euro.
Intervistimi i tij vjen disa javë pasi u intervistuan edhe Dejona Mihali, koordinatore e komiteteve në Lëvizjen Vetëvendosje dhe ministrja e ekonomisë Artane Rizvanolli.
