Në argumentin e tyre, ata iu referuan vendimit të fundit të Presidentit Joe Biden për të falur djalin e tij Hunter, të akuzuar për shkelje të taksave dhe armëve.
“Presidenti Biden deklaroi dje se djali i tij u ndoq penalisht në mënyrë selektive dhe të padrejtë dhe se kishte një ‘abuzim të rëndë politik të procesit ligjor'”, sipas një dosjeje nga avokatët e Trump.
Kërkesa vjen pasi gjykatësi Juan Merchan më 22 nëntor shtyu për një kohë të pacaktuar dënimin në këtë rast, duke lejuar të dyja palët të paraqesin argumente të reja në dritën e fitores së Trump në zgjedhjet e fundit presidenciale.
Ekipi i Trump argumenton se procedimi i çështjes prish funksionimin e qeverisë federale dhe shkel doktrinën e imunitetit presidencial, i cili e mbron atë, si president në detyrë ose president i zgjedhur, nga ndjekja penale.
Çështja ka të bëjë me pagesat prej 130,000 dollarësh për aktoren e filmave për të rritur, Stormy Daniels, që dyshohet se janë bërë nga ish-avokati i Trump, Michael Cohen, për të parandaluar zbulimin e një afere të supozuar të vitit 2006. Prokurorët pretendojnë se Trump falsifikoi të dhënat e biznesit për t’i treguar këto pagesa si shpenzime ligjore.
Avokatët gjithashtu i kërkuan gjykatës që të pezullojë plotësisht procedurën, duke theksuar se shtyrja e vendimit për katër vjet do të ishte e papranueshme.
Zyra e prokurorit të Manhattanit propozoi më parë një ndalim të përkohshëm të procesit deri në fund të presidencës së Trump, por ekipi i Trump këmbëngul për një pushim të menjëhershëm të çështjes.
Vendimi për fatin e kësaj procedure pritet në javët në vijim.
