Ekipet e Bashkimit dhe Trepçës kanë shënuar fitore të rëndësishme në ndeshjet e para çerekfinale të Kupës së Kosovës në basketboll, duke bërë hapa të mëdhenj drejt gjysmëfinales.
Bashkimi ka triumfuar ndaj Borës me rezultat bindës 66:88, kurse Trepça ka mposhtur Proton Cable Prizrenin me rezultat 73:91.
Te Bashkimi janë dalluar Mack Smith me njëzet pikë dhe Robert Rikiq me një paraqitje të dyfishtë prej katërmbëdhjetë pikëve dhe dhjetë kërcimeve. Në anën tjetër, për Borën, më i miri ka qenë Vonterius Woolbright me shtatëmbëdhjetë pikë dhe nëntë kërcime. Me epërsinë prej njëzet e dy pikëve nga kjo përballje, Bashkimi është favorit i madh për t’u kualifikuar.
Në ndeshjen tjetër, në Prizren, për vendasit, skuadrën e Proton Cable Prizrenit, Jordan Johnson ka qenë i jashtëzakonshëm me tridhjetë pikë, ndërsa te Trepça janë dalluanr Dardan Kapiti me njëzet pikë dhe Mikaile Tmusiq me gjashtëmbëdhjetë pikë. Me epërsinë prej tetëmbëdhjetë pikëve, ‘Xehetarët’ janë në një pozitë komode për ndeshjen e kthimit që do të zhvillohet javën e ardhshme në Mitrovicë.
