KDI e ka vlerësuar seancën e djeshme të Kuvendit të Kosovës si shpërfaqje e dështimit të përmbushjes efektive të rolit ligjvënës. Kështu ka thënë Eugen Cakolli nga ky Institut në “Info Plus” të RTK-së.
“Seanca e djeshme, një prej më maratonikeve të tërë legjislaturës, shpërfaqi dështimin e Kuvendit që të përmbush në mënyrë efektive rolin e tij ligjvënës. Për ne fakti i miratimit të 20 projektligjeve, nuk përbën ndonjë përmirësim, edhe pse në aspektin numerik mund të duket që po miratohen shumë projektligje”, ka thënë ai.
Cakolli ka kritikuar emërimin e familjarëve të personave nëpër institucione publime, siç është rasti i zgjedhjes së anëtarëve të Bordit të drejtorëve të ndërmarrjes publike, Operatori i Sistemit, Transmisionit dhe Tregut (KOSTT).
“Kemi pasur zgjedhjen e dy anëtarëve të bordit të drejtorëve të KOSST-it, që të dy familjarë të një prej ministrave dhe zëvendëskryeministrit të parë. Disa orë më pas, Kuvendi ka miratuar Ligjin për Byronë dhe disa vendime të tjera të cilat do të duhej të ishin në funksion të luftës ndaj korrupsionit. Të marrësh vendime që janë në esencë nepotike dhe që mund të jenë edhe konflikt i interesit, janë elemente që tregojnë se vendimmarrja e Kuvendit është vënë në funksion të interesave partiake, sidomos duke e ditur që po merren pak javë para përmbylljes së mandatit kushtetues të Kuvendit”, ka thënë Cakolli.
