Fusha e mbrojtjes është pjesë e bashkëpunimit të ngushtë ndërmjet Shqipërisë dhe Kosovës dhe synon forcimin e kapaciteteve dhe aftësive të FSK-së për t`i përmbushur standardet e NATO-s.
Gjatë qëndrimit në Tiranë, ministri i Mbrojtjes i Kosovës, Ejup Maqedonci, ka vizituar pjesëtarë të Forcës së Sigurisë së Kosovës të cilët po studiojnë dhe po trajnohen në Shqipëri.
Por ky kurs që ndodhet në Fazën e Mbijetesës nuk është edhe i lehtë të kalohet.
Ata janë të detyruar të aftësohen se si të mbijetojnë në kohë lufte.
Për ushtarët, mungesa e ushqimit gjatë luftës, është një nga sfidat më të mëdha që mund të përballen.
Andaj mënyra se si të kapet preja duhet mësohet patjetër.
Në kohë të ashpra përdorimi i zjarrit për gatimin e ushqimit është një praktikë e zakonshme në terren.
Puset e ujit mund të jenë të ndotura në rastet e luftimeve të ashpra. Kështu që ushtarët duhet të mësojnë metoda për filtrimin e ujit.
Të gjitha këto ushtrime pjesëtarë të FSK-së, së bashku me ushtarët shqiptarë, janë duke i kryer në Bazën Ushtarake në fshatin Zall-Herr të Tiranës, të Regjimentit të Operacioneve Speciale të Shqipërisë.
Krejt nga afër këto ushtrime i ka parë ministri i Mbrojtjes, Ejup Maqedonci, i shoqëruar nga Komandanti i Forcës Tokësore, i Forcave të Armatosura Shqiptare, gjeneralmajor Ilir Xhebaxhia.
Maqedonci para këtyre ushtarakëve ka përmendur sulmet e shpeshta terroriste kundër Republikës, me paramendime katastrofal për popullin.
“Kishte synim gjunjëzimin e shtetit dhe pengimin e shërbimeve esenciale për qytetarët. Ky nuk është sulm tipik ushtarak por është sulm kinetik që na obligon ne që të jemi të përgatitur të ballafaqohemi edhe me situata të tilla kur ne nuk e shohim kundërshtarin por i shohim pasojat që i ka krijuar kundërshtari dhe duhet të merrmi me to”, ka thënë Maqedonci.
E komandanti i Forcës Tokësore, i Forcave të Armatosura Shqiptare, gjeneralmajor Ilir Xhebaxhia u shprehë tejet i kënaqur me aftësitë e pjesëtarëve të FSK-së.
“Djem të mrekullueshëm unë i kam vizituar edhe një herë tjetër, dhe nga raportet që marrë kanë bërë një punë të mirë, janë shumë të motivuar dhe kjo është shumë e rëndësishme për një ushtarak që të jetë i motivuar. Porta jonë do të jetë e hapur për trajnime në të ardhme pasi këto kurse janë të vështira”, ka thënë Xhebaxhia.
Por gjithçka që praktikohet në terren, duhet ta ketë edhe teorinë e saj.
Andaj një grup tjetër i pjesëtarëve të FSK-së po ndjekin studimet në Fakultetin e Mbrojtjes dhe Sigurisë në Tiranë.
Edhe këtu Maqedonci pati një mesazh për ta.
“Jemi të vetëdijshëm që ne kemi një rrugë të gjatë qysh kemi një rrugë të gjatë të zhvillimit, kemi me pas edhe rrugë të gjatë të ballafaqimit me sfida dhe sfidat nuk përfundojnë me një sfidë me një sulm, por me shumë përpjekje. Jemi pjesë e familjes së vendeve demokratike në mbështetje të luftës së Ukrainës, po synojmë NATO e bashkë me NATO kemi me u ballafaqua edhe me sfida tjera globale”, ka thënë Maqedonci.
E shkrepja e një fotografie ilustron thellimin dhe forcimin e marrëdhënieve të sigurisë dhe të mbrojtjes mes Shqipërisë dhe Kosovës.
