Kryetari i Partisë Demokratike të Kosovës, Memli Krasniqi, apelon që Dhomat e Specializuara të veprojnë me përgjegjësi maksimale. Ai thotë se vendimet e tyre duhet të mbështeten vetëm në fakte dhe parime ligjore.
Në reagimin e tij pas njoftimit të fundit nga Zyra e Prokurorit Special, se Hashim Thaçit i është shtuar edhe një aktakuzë, Krasniqi thotë se drejtësia nuk duhet, asnjëherë, të përdoret si mjet për të rishkruar historinë apo për të kontestuar sakrificat e atyre që luftuan për lirinë e Kosovës.
Krasniqi thotë se është shqetësues qasja e këtyre procedurave gjyqësore duke përmendur faktin se Thaçi tashmë ka katër vite që ndodhet në paraburgim.
Sipas kreut të PDK-së, këto shqetësime thellohen më tej nga arrestimi i tri personaliteteve të tjera, si dhe nga fletëthirrja për paraqitje para Dhomave të Specializuara për Hajredin Kuçin.
“Kërkojmë drejtësi dhe vetëm drejtësi, derisa qëndrojmë fuqishëm kundër çdo veprimi që cenon këtë parim themelor dhe të paprekshëm për secilin qytetar të Kosovës”, shkruan Krasniqi në Facebook.
“Ne mbështesim fuqishëm parimet e drejtësisë dhe llogaridhënies, por një pyetje e thjeshtë dhe kritike ngrihet sonte: A po reflekton ky proces drejtësie paanshmërinë dhe profesionalizmin që Kosova, qytetarët e saj dhe çlirimtarët tanë në Hagë e meritojnë?”
“Të gjithë e dijmë se lufta çlirimtare e popullit tonë ishte e drejtë, fisnike dhe e rrënjosur në të drejtën universale për liri dhe dinjitet. Çdo përpjekje për t’i dhënë tjetër kahje kësaj të vërtete, rrezikon të minojë jo vetëm legjitimitetin e drejtësisë, por edhe të cenojë trashëgiminë e një lufte të shenjtë për liri”, shton tutje Memli Krasniqi. /Kosovatimes/
