Edhe 28 nëntori i këtij viti e gjeti kryeqytetin pa shtatoren dhe sheshin e komandantit legjendar, Adem Jashari.
Nga komuna nuk kanë pasur ndonjë përgjigjje pse nuk u realizua projekti, por kanë thënë se komisioni përzgjedhës, pas votimit nga ana e publikut, do të shpallë fituesin e projektit, i cili pritet të zbatohet gjatë vitit 2025.
Nga opozita e quajnë zvarritje të panevojshme.
“Sheshit i ka munguar e po i mungon edhe sot një shatorë e komandantit tonë legjendar. Mirëpo që edhe tani në momentin që po flasim ende nuk ka diçka konkrete për të njëjtën. Kuvendi komunal e kishte ndarë edhe vendin dhe e kishte votuar pozicionin, ka pasur edhe mjete të ndara për këtë projekt”, tha Feim Osmani, asamblist i VV-së në Prishtinë.
Në PDK thonë se ekzekutivi në kryeqytet ka dështuar rreth këtij projekti.
“Kjo nuk donë më shumë koment, përveçse të gjitha punët tjera edhe në këtë punë kryetari Perparim Rama po dështon dhe lëndon një proces të shenjtë siç është trajtimi me heroin kombëtar Adem Jashari, i cili do të duhej tashmë të ishte në Prishtinë” ,ka thënë Leutrim Retkoceri, shef i asamblistëve të PDK-së në Prishtinë.
Në shtator të këtij viti, Komuna e Prishtinës kishte hapur ekspozitën, me projektet për sheshin monumental “Adem Jashari”, ku pesë projektet, të cilat ishin përzgjedhur si më të mirat u shfaqën për një javë rresht në hapësirat e komunës së Prishtinës, por fituesi i projekti nuk është zgjedhur ende.
