Një 28-vjeçar shqiptar ka raportuar se është rrahur nga dy persona e më pas është sulmuar edhe me armë zjarri. I njëjti ka kërkuar ndihmë mjekësore në Spitalin e Gjakovës.
Sheremet Elezaj, zëdhënës në Policinë e Gjakovës tha për RTKlive se në vendin e ngjarjes janë gjetur tre fishekë dhe dy gëzhoja.
Ai tha se hetimet po vazhdojnë për të sqaruar rrethanat dhe identifikuar të dyshuarit.
“Rreth orës 12:25, jemi njoftuar se një shtetas shqiptar rreth moshës 28 vjeçare, ishte dërguar në spitalin e përgjithshëm në Gjakovë me lëndime të shkaktuara nga armë zjarri. Sipas informatave të para, viktima ka raportuar se, gjatë lëvizjes me veturë në rrugën Morinë-Gjakovë, në fshatin Nec, është ndalur nga dy persona të panjohur, të cilët fillimisht e kanë sulmuar me mjet të fortë dhe më pas me armë zjarri. Nga personeli mjekësor, jemi njoftuar se viktima aktualisht është jashtë rrezikut për jetën”, tha ai.
Sipas tij ,në vendin e ngjarjes kanë dalë ekipet e nevojshme policore, të cilët kanë kryer ekzaminimet e nevojshme hetimore, me ç’rast edhe janë gjetur tre fishekë dhe dy gëzhoja.
“Lidhur me këtë ngjarje është njoftuar Prokurori për Krime të Rënda, me vendimin e të cilit është iniciuar rast vrasje e mbetur në tentativë, ndërsa hetimet po vazhdojnë për të sqaruar rrethanat dhe identifikuar të dyshuarit”, tha ai.
