Rebelët dhe civilët sirianë sulmuan pallatin presidencial të Bashar al-Assad në Damask, duke u larguar me sende luksi, ndërsa të tjerët hynë në një garazh plot me makina të shtrenjta dhe plaçkitën çanta plot me para.
Në videot që janë shfaqur në rrjetet sociale, shihen njerëz teksa bastisin veshjet dhe dollapët e presidentit dhe gruas së tij, Asma al-Assad, të cilët njihen për stilin e tyre luksoz të jetesës.
Jorganët dhe çarçafët janë shpërndarë nëpër dysheme, ndërsa një burrë mban një kuti Louis Vuitton portokalli lart shkallëve, pranë një grabitësi tjetër që mban një çantë plot me sende.
Përveç plaçkitjes së pallatit luksoz, militantët bastisën edhe garazhin që strehonte koleksionin e makinave të Asadit, duke përfshirë Mercedes, Ferrari dhe Audi. Automjetet u konfiskuan dhe u morën, thonë rebelët.
Por grabitja nuk mbaroi me kaq – rebelët dhe qytetarët hynë edhe në Bankën Qendrore të Sirisë, nga e cila morën çanta plot me para, shkruan Daily Mail .
