Pamjet ajrore tregojnë se mbrëmë vonë, radhët e gjata të automjeteve janë krijuar në rrugët që të çojnë në Damask, por edhe në drejtim të kundërt, pas çlirimit të kryeqytetit sirian nga forcat e regjimit, raporton Anadolia.
Sirianët që kanë pritur për vite me radhë rënien e regjimit të Bashar al-Asad-it, u nisën drejt kryeqytetit që çliruan.
Festohet çlirimi
Çlirimi i Damaskut dhe qyteteve të tjera siriane u festua në të gjithë vendin dhe rajonin, si dhe në botë. Shumë sirianë kanë filluar të kthehen në atdheun e tyre nga Libani fqinj.
Siria ka qenë skena e një lufte civile për 13 vjet, dhe pas një periudhe qetësie relative, përleshjet midis forcave të regjimit të Asadit dhe grupeve kundër regjimit shpërthyen sërish më 27 nëntor në zonat rurale në perëndim të Aleppos.
Forcat opozitare filluan më pas një ofensivë rrufe dhe pushtuan qytetet kryesore në dhjetë ditë, duke përfunduar me kapjen e kryeqytetit Damasku dje.
Asadi iku në Moskë
Ministria e Jashtme ruse njoftoi se Assad kishte marrë vendimin për të dhënë dorëheqjen dhe për t’u larguar nga Siria i vetëm. Më vonë u raportua se Asad dhe familja e tij kishin mbërritur në Moskë sepse Rusia u kishte dhënë azil.
