Gazetarja dhe autorja e emisionit Kiks Kosova që transmetohet në Klan Kosova, Ardiana Thaçi Mehmeti, është shpallur Gazetarja e Vitit 2024 nga Asociacioni i Gazetarëve të Kosovës.
Çmimi asaj iu nda për hulumtimin për grupin famëkeq, Albkings, që ishin shndërruar në makth për gratë kosovare.
Në ceremoninë e pranimit të çmimit, Thaçi-Mehmeti tha se këtë vit është përballur me një sfidë që nuk e ka besuar se do të përballet ndonjëherë.
“Rastësisht më kanë bërë pjesë të një grupi të quajtur Albkings, dhe këtë çmim ia dedikoj të gjitha atyre grave që nuk kanë pasur gra dhe janë detyruar të ndërrojnë jetën e tyre, numrat e telefonit, të heshtin e të mos u tregojnë as familjeve të tyre. Njerëzit që duhet falënderuar janë dy familjet e mia: e para, gazetarët e Kiks Kosovës të cilët bashkë me neve si ekip kemi hulumtuar edhe para se emri im të bëhet pjesë e këtij grupi, dhe normalisht edhe fëmijët e mi, të cilët e kanë përjetuar jo mirë këtë sfidë, sepse unë aktualisht kam fëmijë adoleshentë të cilët e kanë përjetuar tepër keq për shkak të ngacmimeve që i kanë marrë në shkollë”.
“Pra, ky çmim shkon për gazetarët e KIKS-it, gratë që nuk kanë pasur zë dhe djalit tim Diarit, i cili e ka përjetuar më së rëndi këtë sfidë”, deklaroi gazetarja Thaçi-Mehmeti.
