Partia “Guxo”, në kuadër të koalicionit Vetëvendosje-Guxo-Alternativa, ka njoftuar sot bashkimin e profesor Nezir Kraki në garën për zgjedhjet e 9 shkurtit. Kraki, një intelektual i njohur dhe profesor i shkencave politike e marrëdhënieve ndërkombëtare në Paris, vjen nga Juniku dhe njihet për kontributin e tij të çmuar në zhvillimin e mendimit kritik dhe promovimin e imazhit të shqiptarëve në botë.
Donika Gërvalla, kryetare e Guxo, theksoi se Profesor Kraki është një shtyllë e rëndësishme për misionin e tyre të vazhdueshëm në shërbim të Kosovës.
“Me Profesor Krakin dhe profesionistë të tjerë të guximshëm, angazhimi ynë do të jetë i gjithanshëm dhe dinamik në mandatin e dytë. E ardhmja u takon atyre që guxojnë,” u shpreh Gërvalla.
Nezir Kraki ka një përvojë të gjerë akademike dhe politike, duke qenë një zë i fuqishëm për integrimin evropian të Kosovës dhe një kritik i zhvillimeve në Ballkan. Me analizat dhe paraqitjet e tij frymëzuese në mjediset ndërkombëtare, ai ka luajtur një rol të rëndësishëm në promovimin e vlerave shqiptare. /Kosovatimes/
