“Katër muajt e ardhshëm mund të jenë kritik për situatën e sigurisë në veri”, këtë e tha në magazinën “Info Plus” në RTK, Skender Perteshi nga Instituti për Siguri dhe Reziliencë “Prevent”.
Pikërisht ky institut gjatë ditës publikoi raportin: Siguria në veri të Kosovës pas sulmeve terroriste në Banjskë e në kanalin e Ibër- Lepencit.
“Në bazë të analizës, vlerësohet që katër muajt e ardhshëm mund të jenë kritik për situatën e sigurisë në veri. Arsyeja e parë është marrja e mandatit nga presidenti Trump dhe deri të bëhet ky tranzicion i administratës amerikane mund të ketë një vakum të politikës së jashtme dhe fokusit të SHBA-ve ndaj Kosovës dhe rajonit në përgjithësi, e ky momentum mund të përdoret nga strukturat kriminale e terroriste me mbështetje të Beogradit zyrtar për të ndërmarrë edhe një sulm tjetër terrorist ndaj institucioneve të shtetit, aseteve strategjike apo ndaj edhe ndaj popullatës civile. Nën dy, zgjedhjet parlamentare në Kosovë mund ta zhvendosin fokusin e liderëve politik nga fushata e më pak të kenë fokus nga situata në veri. Kjo mund të shfrytëzohet po ashtu nga struktura të krimit të organizuar për të krijuar një pasiguri në vend dhe do të tentojnë të ndryshojnë gjendjen faktike që ka ndodhur në tri vitet e fundit ku ka prezencë më të madhe, siguri më të madhe e më pak krim të organizuar e struktura kriminale në veri të Kosovës”, tha ai.
Tutje Perteshi tha se raporti i publikuar nga instituti e analizon dhe e vlerëson situatën e sigurisë në Kosovë, veçanërisht në veriun e Kosovës, prezencën dhe rrezikshmërinë që paraqesin organizatat ekstremistët që kanë vepruar për më shumë se dy dekada në veriun e vendit.
“Raporti vlerëson përpjekjet e institucioneve të Kosovës për të vendosur rend e ligj, duke u përballur me strukturat e krimit të organizuar, ekstremiste që kanë vepruar për një kohë të gjatë në veri. Po ashtu, raporti vlerëson edhe rreziqet e kërcënimet që po i kanosen vendit të cilat mund të jenë burim i jo stabilitetit dhe pasigurisë jo vetëm në veri të Kosovës, por edhe në rajon në përgjithësi”, shtoi Perteshi.
Ai ka treguar se mbi cfarë të gjeturash e hulumtimesh është bazuar raporti i publikuar nga ta pas sulmeve terroriste në Banjskë e në kanalin e Ibër- Lepencit.
“Janë analizuar dokumente të ndryshme zyrtare, jo zyrtare, intervista me njerëz të fushës. Të gjitha këto raporte i kemi analizuar dhe ka të dhëna të mjaftueshme që strukturat e krimit të organizuar e ekstremiste me mbështetje zyrtare direkte prej Beogradit dhe strukturave të sigurisë së Serbisë për më shumë se 3 vite kanë planifikuar këto sulme në Kosovë. Qëllimi i sulmit në Banjskë ka qenë pushtimi i pjesës veriore dhe shkëputja nga Kosova e bashkimi i atij territori me Serbinë”, tha ai.
Perteshi tha se reagimi profesional i Policisë së Kosovës neutralizoi sulmin në Banjskë, duke bërë që të dështojnë strukturat kriminale terroriste që ta ekzekutojnë atë.
