Ushtria e IZRAELIT ka avancuar në rreth 25 kilometra në jugperëndim të Damaskut në inkursionin e saj në Siri, thanë burimet siriane të sigurisë, pasi Izraeli pushtoi një zonë tampon në jug të vendit dhe kreu sulme ajrore mbi ushtrinë siriane dhe bazat ajrore gjatë natës.
Operacioni ushtarak i Izraelit në Siri erdhi dy ditë pasi një aleancë rebele rrëzoi me shpejtësi presidentin Bashar al-Assad dhe në një kohë kur rajoni dhe fuqitë botërore janë të shqetësuara për zhvillimet e mëtejshme në situatë.
Një burim sirian i sigurisë tha se ushtarët izraelitë arritën në Katana në Siri, 10 kilometra në lindje të zonës së demilitarizuar që ndan Lartësitë Golan të pushtuara nga Izraeli nga Siria.
Izraeli: Nuk do të përfshihemi në konflikt
Izraeli ka thënë se nuk do të përfshihet në konfliktin sirian dhe se pushtimi i zonës tampon është një akt mbrojtës. Egjipti, Katari dhe Arabia Saudite e dënuan inkursionin. Arabia Saudite tha se masa do të “shkatërronte perspektivat e Sirisë për të rivendosur sigurinë”.
Zyrtarët rajonalë të sigurisë dhe zyrtarët e ushtrisë së shpërbërë të Sirisë thanë se sulmet e rënda ajrore izraelite mbi objektet ushtarake dhe bazat ajrore në të gjithë Sirinë vazhduan gjatë natës, duke shkatërruar dhjetëra helikopterë dhe avionë, si dhe pajisje strategjike të Gardës Republikane në dhe rreth Damaskut.
Pas rreth 200 sulmeve, asgjë nuk ka mbetur nga pajisjet strategjike të ushtrisë siriane, shtuan ata. Izraeli ka njoftuar se sulmet ajrore do të zgjasin me ditë, por i ka thënë Këshillit të Sigurimit të Kombeve të Bashkuara që të mos ndërhyjë në konfliktin sirian.
Tel Avivi tha se kishte marrë “masa të kufizuara dhe të përkohshme” vetëm për të mbrojtur sigurinë e tij.
