Komisioni për Siguri i Kuvendit të Kosovës i ka thënë po Planit të Performancës së Agjencisë për Informim dhe Privatësi për vitin e ardhshëm. Megjithatë, ky plan nuk ishte e vetmja temë diskutimi aty. Deputetët e pyetën Komisioneren për Informim e Privatësi, Krenare Sogojeva Dermaku për mundësinë e mbylljes së tik-tok-ut.
Deputeti Dimal Basha ka pyetur rreth mundësive për të qenë më strikt që të miturit nën 16 vjeç të mos kenë mundësinë e hapjes së rrjeteve sociale si tik –tok-u e rrjete të tjera.
Ndërkaq, deputeti tjetër Hisen Berisha tik-tok-un e quajti si një nga rrjetet më të dëmshme që është jashtë kontrollit për të cilin ShBA ka thënë se është e rrezikuar.
Komisionerja tha se te çështjet e platformave sociale në Kosovë problem është mungesa e domenit zyrtarë.
Por, tregoi se vitin e ardhshëm pritet të mbahet një konferencë e madhe pikërisht për të parë si duhet të rregullohet kjo çështje dhe cilat janë sfidat e Kosovës si shtet, krahas përdorimit të tik-tok-ut.
Një çështje tjetër që përmendi deputeti Berisha ishte edhe publikimi i listave të veteranëve që ai tha se nuk janë të rrejshëm, por që që kanë gabime na aplikacione e që të njëjtëve sot për shkak të publikimit të të dhënave të tyre u rrezikohet jeta nga Serbia.
Por, komisionerja Sogojeva-Dermaku tha se lista e veteranëve nuk është në domenin e agjencisë.
Deputetët e Vetëvendosjes duke mos u pajtuar me fjalimet e deputetit Berisha aty, lëshuan mbledhjen, por paraprakisht e votuan planin e kësaj agjencie, për ta liruar pastaj sallën e mbledhjeve.
Komisionerja aty ka renditur objektivat që kanë si agjenci dhe si objektiv të parë e përmendi avancimin e mekanizmave për mbrojtjen e të dhënave personale përmes inspektimeve dhe ngritjes së kapaciteteve dhe ekspertizës, forcimin e transparencës dhe llogaridhënies, forcimi i partneritetit ndërkombëtarë e me institucionet homologe në nivel rajonal, bashkëpunimi me akterë me interes në promovimin e së drejtës për mbrojtjen e të dhënave personale dhe rritjen e transparencës së institucioneve publike.
