Kryetari i Lidhjes Demokratike të Kosovës (LDK), Lumir Abdixhiku, ka mbajtur një organizim madhështor në Gjakovë, duke përmbyllur me entuziazëm publikimin e listës së kandidatëve për zgjedhjet e ardhshme. Abdixhiku e cilësoi këtë moment si “fillimin e rikthimit të madh” për LDK-në, duke vlerësuar mbështetjen e madhe qytetare në të gjitha qytetet dhe fshatrat e Kosovës.
“Ky ekip është ëndrra jonë për Kosovën – një Kosovë që e duam dhe e meriton! Në çdo cep të vendit, qytetarët po e thonë qartë – ata duan ndryshim,” deklaroi Abdixhiku, duke vlerësuar listën e kandidatëve si të përbërë nga njerëz punëtorë, të ndershëm dhe të përgatitur profesionalisht.
Në listën e publikuar, veçohen emrat e Shefqet Shehut, kryetar i degës së LDK-së në Gjakovë, si dhe kandidatët Sevdije Lama, Valon Bellanica, Muharrem Kurti dhe partneri nga PSHDK, Zef Morina.
Abdixhiku falënderoi organizatorët në Gjakovë dhe Shefqet Shehun për mikpritjen e jashtëzakonshme, duke theksuar se energjia dhe entuziazmi i qytetarëve janë tregues i qartë i momentumit të madh të LDK-së për t’u rikthyer si forca kryesore politike në vend.
“Me këtë listë, ne i ofrojmë Kosovës ndryshimin që e meriton. Bashkë me qytetarët, ne do ta ndërtojmë të ardhmen,” përfundoi ai, duke ftuar të gjithë qytetarët të bëhen pjesë e kësaj lëvizjeje për një Kosovë më të mirë. /Kosovatimes/
