Kryetari i Partisë “FJALA”, Gëzim Kelmendi, ka njoftuar sot se partia ka përfunduar zyrtarisht aplikimin në Komisionin Qendror të Zgjedhjeve (KQZ) për të marrë pjesë në zgjedhjet parlamentare që do të mbahen më 9 shkurt 2025.
Në një deklaratë publike, Kelmendi theksoi se lista e kandidatëve të Partisë “FJALA” përfaqëson individë të dalluar për vlera të larta atdhetare, morale dhe intelektuale. Ai potencoi se kandidatët e përzgjedhur janë figura që kanë kontribuuar në lirinë dhe pavarësinë e Kosovës dhe që posedojnë tituj të lartë shkencorë e ekspertizë të dëshmuar në nivel kombëtar dhe ndërkombëtar.
“Kandidatët tanë janë njerëz që iu përgjigjën atdheut kur kishte nevojë, që luftuan dhe sakrifikuan për lirinë e vendit tonë,” deklaroi Kelmendi.
“Lista jonë reflekton përvojën dhe profesionalizmin e duhur për të përfaqësuar popullin e Kosovës në Kuvend.”
Duke përfunduar, Kelmendi shprehu urimin e tij për mbarëvajtjen e procesit zgjedhor dhe bekimin për popullin dhe shtetin e Kosovës: “Zoti e bekoftë popullin tonë dhe shtetin tonë.” /Kosovatimes/
