Ambasadorja e Izraelit në Kosovë, Tamam Ziv, hapi sot një dhomë të re lojërash për fëmijët e shtruar në spitalin e Mitrovicës, një iniciativë me një rëndësi të veçantë humanitare dhe simbolike. Kjo hapësirë, e krijuar si dhuratë nga fëmijët dhe populli izraelit, është dedikuar kujtimit të fëmijëve që humbën jetën në sulmet e 7 tetorit 2023 në Izrael.
Gjatë ceremonisë, ambasadorja Ziv shprehu emocionet e saj duke theksuar se ky projekt është më shumë se një dhuratë; është një mesazh shprese dhe qëndrueshmërie. “Kjo sallë lojërash i kushtohet kujtimit të atyre fëmijëve që u ndanë nga jeta në moshë kaq të re dhe është një simbol i jetës, gëzimit dhe shërimit. Jam thellësisht e prekur nga solidariteti i popullit të Kosovës në këto kohë të vështira, gjë që tregon lidhjen e qëndrueshme mes kombeve tona,” deklaroi ajo.
Ziv theksoi rëndësinë e lojës në procesin e rikuperimit fizik dhe emocional të fëmijëve, duke e quajtur dhomën një vend ku të vegjlit mund të harrojnë për pak çaste sfidat shëndetësore dhe të përfitojnë nga fuqia shëruese e argëtimit.
Ambasadorja kujtoi sulmet brutale të Hamasit ndaj civilëve izraelitë, duke përmendur me dhimbje viktimat e reja, përfshirë 39 fëmijë të vegjël. “Partneriteti ynë me Kosovën bazohet në vlerat e shpresës, qëndrueshmërisë dhe humanizmit. Në këtë dhomë lojërash, ne nderojmë kujtimin e atyre fëmijëve duke krijuar diçka që ushqen jetën dhe shpresën për të ardhmen,” tha ajo.
Duke iu drejtuar stafit të spitalit, Ziv lavdëroi punën e tyre të përkushtuar, duke theksuar se kjo hapësirë do të ndihmojë në përmbushjen e misionit të tyre për të ofruar kujdes jo vetëm mjekësor, por edhe emocional. Dhomat e lojërave, sipas saj, janë esenciale për rikuperimin e shpejtë të pacientëve të vegjël dhe për mirëqenien e tyre.
Ceremonia përfundoi me një mesazh frymëzues për paqen dhe unitetin. “Le të na frymëzojë kjo sallë për të ndërtuar një botë ku çdo fëmijë, pavarësisht nga origjina, të rritet në siguri, dashuri dhe harmoni,” tha ambasadorja.
Kjo iniciativë simbolizon fuqinë e lidhjes njerëzore dhe përpjekjet e përbashkëta për të sjellë shpresë dhe gëzim në jetë, edhe përballë sfidave më të mëdha. /Kosovatimes/
