Dhjetëra mijëra sirianë festuan sot “fitoren e revolucionit” në rrugët anembanë vendit, me thirrjen e liderit rebel Abu Muhammad al-Jolani, pasi regjimi i presidentit Bashar al-Assad u përmbys nga pushteti të dielën.
“Dua të përgëzoj popullin sirian për fitoren e revolucionit dhe t’i bëj thirrje të dalin në rrugë për të shprehur gëzimin e tyre”, tha Jolani, i cili kërkon të quhet me emrin e tij të vërtetë, Ahmed al-Shara.
Pas një ofensive 11-ditore, koalicioni rebel, i dominuar nga organizata e tij radikale islamike sunite Hayat Tahrir al-Sham (HTS), pushtoi Damaskun të dielën, duke i dhënë fund sundimit gjysmë shekulli nga familja Assad.
Mijëra njerëz u mblodhën në rrugët e Damaskut, Aleppos në veri dhe Sweida në jug të vendit, duke festuar dhe valëvitur flamujt me tre yje, simboli i kryengritjes së vitit 2011.
“Ne ishim të shtypur nga babai dhe djemtë e Asadit, por ne e çliruam vendin nga padrejtësia”, tha një polic 47-vjeçar në Aleppo. “Gëzimi ynë nuk mund të përshkruhet,” tha Haitham Hudeifa (54) në Sveida, ku jetojnë Druzët dhe ku u zhvilluan protesta antiqeveritare një vit e gjysmë më parë.
“Të bashkuar, të bashkuar, të bashkuar, populli sirian është i bashkuar”, thërrisnin besimtarët në xhaminë Umajad në Damask, ku Jolani pritet të marrë pjesë në lutjet javore. Por festimi është lënë në hije nga kujtimet e viktimave të dekadave të represionit: në muret e xhamisë janë ekspozuar fotot e dhjetëra atyre që u zhdukën nga duart e forcave të sigurisë.
Samiti për Sirinë të shtunën në Jordani
Udhëheqësit e grupit G7 do të mblidhen sot në një video-konferencë për të diskutuar situatën në Siri.
Kryeministri i ri i Sirisë, i cili do të udhëheqë një qeveri tranzitore deri më 1 mars, ka premtuar të prezantojë një “shtet të së drejtës”. Muhammad al-Bashir u bëri thirrje sirianëve në mërgim të kthehen në atdheun e tyre, duke premtuar se do të “garantojë të drejtat e të gjithëve”.
Të shtunën, Jordania do të presë një samit për Sirinë që do të mbledhë së bashku ministra dhe diplomatë të lartë amerikanë, evropianë, arabë dhe turq.
Sekretari i Shtetit i SHBA Antony Blinken u takua të premten në Ankara me homologun e tij turk Hakan Fidan. Një ditë më parë në Jordani, ai mbrojti një “tranzicion gjithëpërfshirës” drejt një “qeverije të përgjegjshme dhe përfaqësuese”.
Në një konferencë për shtyp me Fidan, Blinken tha se lufta kundër Shtetit Islamik është “imperative”.
Në Sirinë verilindore, Turqia po mbështet forcat rebele që luftojnë Forcat Demokratike Siriane (SDF) të mbizotëruara nga kurdët, të mbështetura nga Shtetet e Bashkuara në luftën kundër Shtetit Islamik.
Presidenti turk Rexhep Tajip Erdogan i tha Blinken të enjten mbrëma se Ankaraja nuk do të lejojë kurrë dobësi në luftën kundër Shtetit Islamik. Ai theksoi gjithashtu se është i vendosur të parandalojë Partinë e Punëtorëve të Kurdistanit, të cilën Turqia e konsideron organizatë terroriste, të përfitojë nga situata në Siri.
Në një gjest për HTS, Administrata Autonome Kurde njoftoi të enjten se po miratonte një flamur të ri sirian për të valëvitur mbi Damask.
Ministri izraelit i Mbrojtjes, Israel Katz i tha ushtrisë të Premten që të përgatitet të qëndrojë gjatë gjithë dimrit në një zonë tampon me Sirinë në buzë të Lartësisë Golan. Ditët e fundit, Izraeli ka kryer qindra sulme ndaj objektivave ushtarake siriane për të parandaluar që pajisjet e ushtrisë siriane të bien në duart e rebelëve.
