Është dita e tretë që struktura menaxheriale të sistemit gjyqësor bashkë me donatorë dhe partnerë ndërkombëtarë janë mbledhur në tryezën e përbashkët të “Ditëve të Gjyqësorit”, aty ku po prezantohen të arriturat, por edhe kërkesat për mbështetje nga partnerët për vitin 2025, të cilat siç kanë thënë organizatorët kanë për qëllim fuqizimin e gjyqësorit dhe përmirësimin e shërbimeve në gjykata.
Këto propozime për vitin që vjen janë si: reformat në administratën gjyqësore dhe ngritjen e kapaciteteve profesionale, sistemet elektronike dhe kualitetin e të dhënave, qëndrueshmërinë, sigurinë kibernetike dhe avancimin e sistemeve digjitale si dhe fuqizimin e mekanizmave të monitorimit dhe inspektimit gjyqësor.
Kryesuesi i Këshillit Gjyqësor të Kosovës, Albert Zogaj, tha se bashkëpunimi i ngushtë ndërmjet institucioneve vendore dhe partnerëve ndërkombëtarë është kyç për fuqizimin e sistemit gjyqësor, avancimin e efikasitetit, transparencës dhe rritjen e besimit të qytetarëve në drejtësi.
Ai theksoi rëndësinë e përkrahjes së mëtejshme për projektet që synojnë përmirësimin e infrastrukturës, digjitalizimin e proceseve dhe rritjen e kapaciteteve profesionale të stafit gjyqësor për vitin që vjen.
