Italia është gati të marrë pjesë në një mision të mundshëm paqeruajtës në Ukrainë, tha dje ministri italian i Mbrojtjes, Guido Crosetto, mëson Ansa . “Shpresoj se do të flasim sa më shpejt për paqen, për forcat paqeruajtëse, në Ukrainë, por edhe në Gaza dhe Liban”, u tha Crosetto gazetarëve në Madrid, kur u pyet për mundësinë që Roma të dërgojë forca paqeruajtëse në Ukrainë.
Presidenti francez Emmanuel Macron ka hedhur idenë e dërgimit të një kontigjenti ndërkombëtar në Ukrainë për të mbikëqyrur një armëpushim të ardhshëm. Megjithëse presidenti francez thuhet se e ka diskutuar këtë ide me Mbretërinë e Bashkuar dhe Poloninë, Italia është vendi i parë që shpreh publikisht gatishmërinë e saj për këtë iniciativë. “Ne jemi të gatshëm ta luajmë këtë rol, një rol në të cilin kemi shkëlqyer gjithmonë si komb”, tha Crosetto.
Ministri i Jashtëm i Italisë nuk është dakord?
Megjithatë, siç raportojnë mediat italiane, brenda Italisë nuk ka një qëndrim plotësisht të unifikuar për këtë çështje. Ministri i Jashtëm italian dhe zëvendëskryeministri Antonio Tajani i quajti të parakohshme diskutime të tilla, pasi lufta në Rusi është ende në vazhdim.
Mbretëria e Bashkuar dhe Polonia kanë deklaruar publikisht se aktualisht nuk po shqyrtojnë dërgimin e trupave të tyre në Ukrainë. Vetëm ministrja e Jashtme gjermane Annalena Baerbock tha se një mundësi e tillë nuk duhet të përjashtohet, megjithëse kancelari Olaf Scholz nuk e mbështeti atë qëndrim.
Më pak përfshirje e SHBA-së, më shumë përfshirje e Evropës
Vendet evropiane pritet të luajnë një rol më të madh për të ndihmuar Ukrainën të mbrohet dhe të pengojë çdo agresion të ardhshëm rus, pasi Trump ka shumë të ngjarë të planifikojë të zvogëlojë përfshirjen e Uashingtonit.
Gjatë bisedimeve me Macron dhe presidentin ukrainas Volodymyr Zelensky në Paris më 7 dhjetor, Trump thuhet se u tha dy liderëve se donte që paqeruajtësit evropianë të monitoronin marrëveshjen e armëpushimit në Ukrainë. Zelensky vuri në dukje se Ukraina “mund ta konsiderojë” një hap të tillë, por vetëm pasi të ketë marrë një afat kohor të qartë për anëtarësimin në NATO, të cilin Trump dhe disa vende anëtare e kundërshtojnë.
Pozicioni i Rusisë mbetet pengesa kryesore, pasi Moska nuk ka treguar gatishmëri për të hapur bisedimet e paqes që nuk do të kërkonin dorëzimin e Ukrainës dhe është qartësisht kundër pranisë së trupave të huaja në territorin ukrainas.
