Qeveria italiane i ka dhënë nënshtetësinë presidentit argjentinas Javier Mileio bazuar në rrënjët e tij familjare italiane, tha një burim i mirëinformuar, duke konfirmuar raportet e mëparshme të mediave.
Milei ndodhet në Romë për të takuar kryeministrin italian Giorgia Meloni dhe për të marrë pjesë në festën e Krishtlindjeve të Vëllezërit të Italisë të shtunën.
Burimi tha se qeveria i kishte dhënë nënshtetësinë italiane liderit argjentinas, pa dhënë detaje të mëtejshme.
Disa politikanë italianë janë të zemëruar
Ky lajm në mediat italiane shkaktoi reagime të zemëruara nga disa politikanë, dhe në rrjetet sociale nga emigrantë, fëmijët e të cilëve kanë lindur në Itali, por nuk mund të marrin nënshtetësinë.
Ligjet e shtetësisë italiane bazohen në lidhjet e gjakut, që do të thotë se edhe pasardhësit e largët të një shtetasi italian mund të marrin një pasaportë italiane.
“Ky është diskriminim i patolerueshëm ndaj kaq shumë të rinjve”
Ligjet për të huajt e lindur në Itali apo ata që kanë emigruar atje janë shumë më të rrepta. Grupet pro emigrantëve propozuan një referendum për të lehtësuar këto ligje, por koalicioni i krahut të djathtë të Giorgia Melonit është kundër lehtësimit.
Riccardo Magi, një deputet i partisë së vogël opozitare +Europa, tha se dhënia e shtetësisë për Milei ishte një akt “diskriminimi i patolerueshëm ndaj kaq shumë të rinjve që do ta marrin atë pas shumë vitesh”.
Gjatë një udhëtimi të mëparshëm në Itali në shkurt, Milei tha në një intervistë televizive se ai “ndihet 75 për qind italian”, duke pasur parasysh se tre gjyshërit e tij ishin me origjinë italiane dhe se ai vetë ka “një pasion të jashtëzakonshëm për operën italiane”.
