Më 13 dhjetor 2024, ish-presidenti i Kosovës, Prof. dr. Fatmir Sejdiu, vizitoi shkollën elitare “New York School of Science in Kosova” (NYSS), duke mbajtur një ligjëratë inspiruese me temën: “Rrugëtimi dhe sfidat deri te Pavarësia e Kosovës”. Kjo ngjarje shënoi një akt të rëndësishëm të nderimit për figurën e tij dhe rolin historik në shtetndërtimin e Kosovës.
Gjatë ligjëratës, ish-presidenti ndau përvojat e tij personale dhe sfidat që kanë shoqëruar Kosovën drejt lirisë dhe pavarësisë. Ai theksoi rëndësinë e përkushtimit kombëtar, unitetit dhe diplomacisë së mençur për të arritur objektiva madhore për vendin.
Nxënësit e shkollës shfaqën interes të veçantë duke parashtruar pyetje mbi çështje të rëndësishme kombëtare, si hapat drejt bashkimit kombëtar dhe avancimin e pozitës ndërkombëtare të Kosovës. Ish-presidenti iu përgjigj me ekspertizë dhe frymëzim, duke ndarë ide dhe perspektiva për rolin e rinisë në të ardhmen e vendit.
Drejtori i shkollës, Prof. dr. Sadik Krasniqi, falënderoi ish-presidentin për vizitën dhe për mesazhin frymëzues, duke e nderuar atë me një “Mirënjohje Nderi” në emër të NYSS. Kjo vizitë u cilësua si një ngjarje e paharrueshme për nxënësit dhe stafin, duke forcuar frymën e vlerësimit ndaj figurave emblematike të Kosovës.
Ky akt është dëshmi se shoqëria kosovare po ndërton një kulturë të respektimit dhe nderimit për kontribuuesit e saj historikë, duke e vendosur Fatmir Sejdiun si një pikë referimi për brezat e ardhshëm. /Kosovatimes/
