Kanë përfunduar dy ndeshjet e ditës së shtunë në kuadër të javës së 17-të të Superligës së Kosovës në futboll.
Ballkani e ka mposhtur Llapin, me rezultat 2-1, në Suharekë.
Dueli mes kampionëve në fuqi të Kosovës dhe llapjanëve, ka dhuruar një sfidë interesante, derisa në fund fitores iu gëzua skuadra nga Suhareka.
Bajram Jashanica (33’) nga penalltia dhe Inacio Da Silva (66’), shënuan nga një gol për fitoren e Ballkanit, derisa golin e vetëm për Llapin e realizoi Ardit Tahir (74’).
Pas kësaj fitore, Ballkani rikthehet në pozitën e dytë me 30 pikë, shtatë me pak se liderja e tabelës, Drita, kurse, Llapi zë vendin e tetë me 17 sosh.
Fitore tejet të rëndësishme ka shënuar Suhareka e cila në udhëtim mundi Malishevën, me rezultat 1-2.
Mevlan Zeka (21’, 40’) ishte njeriu i ndeshjes duke shënuar dygolësh në fitoren e Suharekës, kurse, golin e vetëm për Malishevën e realizoi Drilon Hazrollaj (73’). I njëjti lojtar shënoi edhe në minutën e 34-të, por që goli u anulua pas rishikimit të VAR-it.
Pas kësaj fitore, Suhareka ka 25 pikë në pozitën e pestë, kurse, Malisheva renditet e treta me katër pikë më shumë.
