Kryesia e Sindikatës së Policisë së Kosovës ka marrë pjesë në Konferencën Ndërkombëtare të Këshillit Evropian të Sindikatave Policore (CESP), me temën: “The New Security Landscape: Future of Policing”.
Sipas komunikatës së kësaj sindikate, aty janë prezantuar sfidat dhe synimet për përmirësimin e të drejtave dhe kushteve të punës për zyrtarët policorë të Kosovës.
“Si anëtarë të Këshillit Evropian të Sindikatave Policore – CESP, kjo pjesëmarrje paraqet një mundësi të jashtëzakonshme për të ngritur zërin e zyrtarëve policorë të Kosovës në nivel evropian. Përmes kësaj platforme të fuqishme, sfidat dhe kërkesat e policisë së Kosovës jo vetëm që dëgjohen, por marrin mbështetje nga një rrjet i gjerë sindikatash homologe në Evropë, duke forcuar ndikimin dhe bashkëpunimin për realizimin e qëllimeve të përbashkëta”, thuhet në komunikatë.
Në këtë forum ndërkombëtar, Sindikata e Policisë së Kosovës ka adresuar kërkesat e tyre duke përfshirë krijimin e një kontrate kolektive sektoriale, rishikimin e ligjit për moshën e pensionimit në raport me policët, përforcimin e mbrojtjes shëndetësore dhe sociale.
