Pasditen e sotme në fshatin Mramor të Komunës së Prishtinës ka ndodhur një gjuajtje me armë zjarri, teksa policia është vënë në kërkim të të dyshuarve, por që këta të fundit kanë arritur të arratisen. Më pas gjuajtje me armë janë dëgjuar edhe në fshatin Llukar.
Zëdhënësi i Policisë së Kosovës për Rajonin e Prishtinës, Agron Borovci e ka konfirmuar rastin për RTKlive, teksa ka bërë të ditur se të dyshuarit kanë rrezikuar jetën e zyrtarëve policor.
“Rreth orës 17:30 është pranuar informata për gjuajtje me armë zjarri në fshatin Mramor të Komunës së Prishtinës. Policia menjëherë ka dalë në vendin e ngjarjes, me ç‘rast ka identifikuar një veturë të dyshuar, e cila përkundër sinjalizimit të policisë për t’u ndalur në pikë kontrolli e njëjta ka refuzuar duke vozitur me shpejtësi të madhe dhe duke manovruar rrezikshëm, kësisoj duke vënë para rrezikut të drejtpërdrejtë zyrtarët policor”, ka theksuar Borovci.
Ai tutje ka bërë të ditur se duke parë rrethanat e ngjarjes policia me shpejtësi ka organizuar edhe një tjetër pikë kontrolli me qëllim ndalimin e veturës së dyshuar porse vetura sërish nuk është ndaluar dhe me manovrime të rrezikshme ka bërë përpjekje të qëllimshme për të goditur zyrtarët policor.
“Për të shmangur rrezikun e menjëhershëm dhe të drejtpërdrejtë për jetën, zyrtarët policor janë detyruar të përdorin armën e zjarrit. Aktualisht vetura e dyshuar nuk është ndaluar si dhe personat e dyshuar tani për tani janë në arrati. Policia me përkushtim po vijon punën e saj për identifikimin e të dyshuarve të përfshirë në këtë rast si dhe lokalizimin e vendndodhjes së tyre”, ka shtuar Borovci.
Ai ka thënë se siguria e oficerëve dhe qytetarëve mbetet prioriteti më i lartë i policisë, derisa ka bërë thirrje kujtdo që ka informacion në lidhje me personat e dyshuar të përfshirë në këtë rast të kontaktojë menjëherë policinë.
