Një gjykatë në Iran e dënoi me 10 vjet burg ish-gazetarin e redaksive iraniane të Radios Evropa e Lirë, Reza Valizadeh . Shkak janë akuzat se ai “bashkëpunonte me një qeveri armiqësore”.
Valizadeh ka shtetësi të dyfishtë iranio-amerikane.
Dënimi i tij është një masë tjetër kundër mediave të pavarura në Iran, ku puna e tyre është e ndaluar në mënyrë efektive. Represionet kundër disidentëve dhe kritikëve të regjimit islamik në vend u intensifikuan pasi protestat antiqeveritare filluan në vitin 2022.
Pse ka rëndësi se çfarë ndodh në Iran
Vetë Valizade ka punuar për Radio Farda, shërbimin iranian të Radios Evropa e Lirë, për 10 vjet dhe deri në vitin 2022. Vitet e fundit ai nuk ka jetuar në Iran, por në fillim të këtij viti është kthyer në vend për të vizituar të afërmit e tij.
Ai u arrestua në shtator me akuzat që SHBA i hodhi si “të padrejta” dhe në kundërshtim me standardet ligjore ndërkombëtare.
Organizatat për lirinë e shtypit, përfshirë Reporterët pa Kufij dhe Komitetin për Mbrojtjen e Gazetarëve, u bënë thirrje autoriteteve iraniane që të lirojnë menjëherë Valizadeh.
Presidenti dhe CEO i Radios Evropa e Lirë, Stephen Kapus gjithashtu bëri thirrje për lirimin e Valizadeh, duke thënë se akuzat kundër tij dhe dënimi i tij ishin të padrejta.
“Kohë pas here, regjimi iranian është përpjekur të përhapë ndikimin e tij keqdashës në mbarë botën, duke shkelur të drejtat e njeriut në çdo rast,” tha Kapus në një deklaratë. “Është e qartë se ky regjim ndihet i kërcënuar nga forcat e lirisë, përfshirë edhe gazetarinë e pavarur”, shtoi ai.
Irani është akuzuar rregullisht për arrestimin e shtetasve të dyfishtë dhe shtetasve perëndimorë me akuza të sajuara, në mënyrë që t’i përdorë ato për të ushtruar presion ndaj vendeve perëndimore. Në shtator 2023 Teherani ka liruar pesë amerikanë të mbajtur në burgjet iraniane në një shkëmbim të të burgosurve.
Valizadeh është shtetasi i parë amerikan që dihet se është arrestuar që nga kjo marrëveshje.
Në dhjetor 2022 Qeveria iraniane shtoi shërbimin lokal të Radios Evropa e Lirë, Radio Farda, në listën e saj të personave dhe organizatave që mbështesin terrorizmin.
Kjo ndodhi pas më shumë se 12 javësh që Radio Farda mbulonte protestat masive që shpërthyen për vdekjen e 22-vjeçares Mahsa Amini, e cila u arrestua nga policia morale për veshjen e gabuar të hixhabit.
