Rektori i Universitetit të Prishtinës, Arben Hajrullahu ka pritur në takim drejtorin e Agjencisë për Parandalimin e Korrupsionit, Yll Buleshkaj. Në këtë takim rektori rikonfirmoi se të gjitha dokumentet e kësaj agjencie për Universitetin e Prishtinës do të trajtohen me prioritet dhe nuk do të ngelin në sirtarë të patrajtuara.
Sipas njoftimit të bërë nga UP-ja, të dy drejtuesit, Hajrullahu që drejton UP-në e Buleshkaj Agjencinë për Parandalimin e Korrupsionit u pajtuan që nga viti i ardhshëm të organizojnë aktivitete të përbashkëta.
Sipas tyre, aktivitetet mund të jenë ligjërata edukative e informuese me studentë e personel administrativ e akademik të UP-së, me qëllim që të ngrihet vetëdija nga ekspertë të Agjencisë për Parandalimin e Korrupsionit lidhur me parandalimin e konfliktit të interesit, sinjalizimin dhe çështje tjera me interes.
UP-ja ka filluar aktivitete të përbashkëta edhe me Institucionin e Avokatit të Popullit. /Kosovatimes/
