Komisioni i Pavarur i Mediave (KPM) ka miratuar Rregulloren për obligimet e ofruesve të shërbimeve mediale gjatë fushatës zgjedhore në mbledhjen e saj të dymbëdhjetë të rregullt, të mbajtur më 16 dhjetor 2024.
Bazuar në nenin 3, paragrafi 2, pika 11 të Ligjit për KPM-në, procedura për hartimin e kësaj rregulloreje u iniciua dhe u zhvillua sipas procedurave për legjislacionin sekondar, siç përcaktohet në nenin 8 të Ligjit Nr. 04/L-44 për KPM.
Drafti i rregullores iu nënshtrua diskutimit publik për 15 ditë, nga 12 nëntor deri më 2 dhjetor 2024, gjatë së cilës periudhë palët e interesuara kishin mundësinë të ofronin komentet dhe sugjerimet e tyre me shkrim. Në vazhdimësi të këtij procesi, KPM mbajti edhe dy dëgjime publike më 6 dhe 12 dhjetor 2024, duke krijuar një mundësi shtesë për të gjithë të interesuarit që të paraqisnin mendimet e tyre para miratimit final.
Pas shqyrtimit të komenteve të pranuara, KPM bëri inkorporimin e atyre që ishin të argumentuara me bazë ligjore në draftin final të rregullores, e cila tani hyn në fuqi pas miratimit.
Kjo rregullore ka për qëllim rregullimin e detyrimeve të mediave gjatë fushatave zgjedhore, për të siguruar transparencë, barazi dhe profesionalizëm në raportimin mediatik. /Kosovatimes/
