Analisti Shenoll Muharremi ka kritikuar ashpër kërkesën e Lëvizjes Vetëvendosje (LVV) për të synuar 500,000 vota në zgjedhjet e 9 shkurtit. Sipas tij, ky objektiv është joreal dhe i rrezikshëm duke marrë parasysh kontekstin aktual politik dhe ekonomik në Kosovë. Muharremi thekson se votat e jashtëzakonshme të vitit 2021, kur LVV arriti 438,335 vota, ishin kryesisht rezultat i një votë-ndëshkimi ndaj partive të tjera dhe efektit të Vjosa Osmanit, të cilat tashmë nuk ekzistojnë.
“LVV ka qenë në pushtet për katër vite, periudhë që e ka ekspozuar dhe konsumuar, ashtu siç ndodh me të gjitha partitë në pushtet. Ekonomia nuk ka pësuar ndryshime të thella dhe inovative, ndërsa arroganca e kërkesës për 500,000 vota, pa prezantuar asnjë program të qartë, mund ta shndërrojë LVV-në në një humbëse morale, pavarësisht fitores numerike”, thekson ai.
Muharremi paralajmëron se pritshmëritë e larta elektorale mund të kthehen në një “befasi të hidhur” për LVV-në më 10 shkurt, nëse rezultati përfundimtar shkon drejt 300,000 votave. Në këtë rast, LVV rrezikon të perceptohet si humbëse, ndërsa partitë opozitare si LDK dhe PDK do të shënojnë rritje të ndjeshme.
Sipas analistit, strategjia aktuale e LVV-së nuk është racionale dhe sugjeron menaxhim të rënies natyrale përmes një partneriteti qeverisës ose përgatitjes për të kaluar në opozitë.
“Më mirë të synojnë një objektiv realist me 300,000 vota dhe të dalin fitues, sesa të mbajnë pritshmëri të parealizueshme që mund të shndërrohen në humbje morale”, përfundon Muharremi. /Kosovatimes/
